Shillong, K’Lyngkot 27
Ki nongtrei Bank kiba hap hapoh ka shatri jong ka United Forum of Bank Unions (UFBU) Meghalaya State Unit ki la dawa na ka Sorkar ban trei 5 sngi.
Kane ka jingdawa ka la mih ha ka jingpynlong ïa ka jingïakhih ki nongtrei jong ki Bank bapher-bapher kiba don hapoh jong ka shatri jong ka United Forum of Bank Unions (UFBU) Meghalaya State Unit ha ka sngi Ba-ar jong ka taïew ba la pynlong ha khmat jong ka State Bank of India, Main branch Shillong.
Ha kane ka sngi pynlong jingïakhih baroh ki Bank kiba don hapoh ka shatri jong ka UFBU ha baroh kawei ka ri India ki la khang lut plaiñ kum ka jingïatylli ban dawa na ka Sorkar India ban pynurlong noh ïa ki mat jingdawa jong ki.
Haba ïakren bad u Convenor jong ka UFBU u Bah Wandaplang Mawroh u la ong ba ka kynhun ka dawa ba kin trei san sngi bad ki sngi Saitjaiñ baroh khoit kin ïoh shuti noh, ym tang ha ka sngi saitjain ba ar bad ba saw.
U la ïathuh ba ka kynhun ka la dep phah ïa ki jingtyrwa ban mynjur ïa kine ki jingdawa kiba la dawa la bun bun snem mynta hynrei ki pynjlan shi pynjlan, kaba pynlong ïa ki ban khot ïa kane ka jingïakhih.
“Hooid kane ka jingïakhih kaba pynthud ïa ki paidbah hynrei ka jingïaleh jong ngi kam dei pyrshah ïa ki paidbah hynrei ka dei na ka bynta ka jingdonkam jong ngi kum ki nongtrei bad na ka bynta ka hok kaba ki dei ban ïoh” la ong u Bah Wandaplang.
Shuh shuh u ong ba ki don bun ki mat jingdawa jong ka kynhun, kum ka jingduna ki nongtrei katba dang mih ki snem bad haba ki dawa ban trei noh tang san sngi ruh kim shym la mynjur haduh mynta.
U Bah Wandaplang Mawroh u la ong ruh ba da ka jingïakhih jong ki, ïa ki nongïalam jong ka kynhun yn sa shah khot ban ïakren bad kin sa pyntip sha ki paidbah ïa kaei kaba ki la ïoh jingtip.
Haba kylli, u Bah Wandaplang u ong “Haduh mynta kim pat ïoh jingtip ei-ei la kin pyntreikam ne em, hynrei ka khubor kaba ki ïoh ka dei beit ba ka Sorkar ka kyrpad ïa ngi ban sangeh ïa kane ka jingïakhih. Ka kynhun ka ïeng skhem ba katba kim pat ïoh ïa ka kular halor ki jingdawa, ngin ïaid beit sha khmat ïa kane ka jingïakhih”.
