Shillong, K’Lyngkot 27
Ki nongrep na kylleng ki jaka kiba la wan ha ka ïew ïadie ïathied ha Shillong, ki la pynpaw ïa ka jingsngewkmen ba ki la ïoh ka lad ban wan die ïa ki mar rep rep jong ki.
Kane ka ïew ïadie ïathied ka dei kaba la pynlong da ka 1917 iTEAMS, ha jaka ïeng kali jong ka Directorate of Fisheries kaba don pyrshah bad ka St.Edmund’s College, Shillong ha ka sngi Saitjaiñ jong ka taïew.
Haba kren sha ki lad pathai khubor ki nongrep ki la ïathuh ba ka jingpynlong ïa kum kane ka prokram ka ïarap shibun eh ïa ki namar tang ha ki shnong ba ki rep kam ïaid ba la bun palat ki nongrep.
Ki la ong ruh ba kane ka dei ka sien kaba nyngkong eh ba ki ïoh ka lad ban wan ha kum kane ka prokram jong ka ïew ïadie ïathied jong ki nongrep ha Shillong bad ka jingpynlong ïa kum kane ka prokram ka long shisha ka jingïarap ïa ki.
Haba kylli, ki la ong “Ngi sngewbiang eh halor ka jingpynlong ïa kum kane ka prokram. Ngi ïohi ruh ba ka don ka jingïarap ban kyntiew bad ban die ïa ki mar rep”.
Haba ïa nujor pat bad ka jingdie ïa ki mar sha shnong, ki nongrep ki la ïathuh ba kim ju lah ban die ha shnong namar ba la bun palat ki mar rep ba ki ïa rep hi, kumta ki ju rah beit ïa ki mar rep sha Shillong ban kham ïaid bha ka ïew ka hat.
