Shillong, K’Lyngkot 27
Ki pulit jong ka Pasteur ki la ïoh ban kem noh ïa ki ar ngut ki briew kiba la kynnoh donkti ha kaba thombor bad knieh ïa ki mobile phone na ki ar ngut.
Katkum ka kyrwoh khubor ba la pyllait da u Superintendent of Police (SP) ka East Khasi Hills u la ïathuh ba ha ka 22 tarik mynta u bnai, la ïoh pdiang ïa ka ejahar (FIR) ba ha ka 21 tarik mynta u bnai, ha ka por kumba 6:30 janmiet, ar ngut ki briew kiba dang ïaid lynti ki la shah shoh ha ki ar ngut kiwei pat kiba la wan da kawei ka arshaka, kaba la jia hajan jong ka CM Connect building, Golflinks, bad ha kaba la knieh jubor ruh ïa ka mobile phone jong ki.
Halor kane, haba la pynlong ïa ka jingtohkit, ha ka 27 tarik mynta u bnai, ki pulit ka Pasteur ki la kem noh ïa u Kitbok Thabah ba ju khot sin Koi, 29 snem, uba sah ha Golflinks, Khliehshnong, kumjuh ruh ïa u paralok jong u, uba la kynnoh donkti lang, u Daniel Syiemlieh, 23 snem, uba na ka shnong Nongmynsong Dongkamon, ha kaba la kem na ka ïing sah jong u.
Ki pulit ki la register ïa ka case lyngba ka Sadar PS C/no. 16(01)2026 U/S 115(2)/304(2)/3(5) BNS.
Ïa ki mobile ba la tuh, la ïoh ban kurup noh bad ruh ban kurup noh ïa ka arshaka kaba la pyndonkam ha ka por ba la pynïaid shakhmat ïa katei ka kam runar.
