Shillong, K’Lyngkot 27
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong ha ka Sngi Ba-ar u la ong ba ka Sorkar ka dang khmih bniah ïa ka jinglah ban pynrung ïa ki kyndon kiba ïasyriem bad ka Inner Line Permit (ILP) ha ka aiñ thymmai jong ka Immigration & Foreigners Act, 2025 (IFA).
“U Myntri Rangbah u la dep kren ba ngi dang khmih bniah la ngi lah ne em ha kane ka aiñ thymmai jong ka Immigration and Foreigners Act, 2025, ban pynrung ïa kano-kano ka jait kyndon hangta, ban pyntreikam ïa ka, kumba long ka ILP,” ong u Bah Tynsong ha ki nongthoh khubor.
U la bynrap, “Hynrei watla katta ruh, ngi la phah ïa kane ka jingtip ba bniah jong ki kyndon ha ka aiñ bathymmai jong ka Immigration and Foreigners Act, 2025 ba la mynjur da ka Ïingdorbar Parliament ban peit bniah biang da u Advocate General bad ka kynhun ki ‘riew shemphang ha ka liang ka aiñ.”
Na ka liang u Bah Tynsong u la kyntait ruh ïa ka jingkynnoh ba ka Sorkar Jylla ka la iehnoh shadien ïa ka Meghalaya Residents Safety and Security Act, 2016 (MRSSA).
“Mano ba ong ïa phi ba ngi la iehnoh ïa ka MRSSA? Ïa ka MRSSA la pyntreikam ha katto-katne ki bynta. Ngi la treikam hapoh ka MRSSA,” u la ong da kaba bynrap, “Ngi la don lypa ïa ka District Task Force (DTF) ba la khlieh da man ki Deputy Commissioner. Ngi la dep ban pyntreikam ïa ki katkum ki kyndon. Ka don, bad ngi dang pynlong ïa ka ban kham treikam shuh-shuh ha kiwei pat ki distrik. Khamtam ha Shillong, ngan ïathuh ïa phi kawei, ba ka (MRSSA) ka treikam pura.”
Haba ïadei bad ka ‘Amendment Bill’ jong ka MRSSA, u Bah Tynsong u la pynshai ba ka aiñ (Original Act) ka duna ïa ki kyndon ban pynïeng ïa ki jaka-rung/jaka-mih, bad dei na kata ka daw ba ïa ka ‘Amendment Bill’ la aiti sha ka tnad kam pohïing ka Sorkar Pdeng.
“Ngi pyntreikam ïa ka (MRSSA), hynrei ha ka liang ka aiñ, ngim lah ban buh ïa ki jaka-rung/jaka-mih namarba kam don kano-kano ka kyndon ha ka ‘Original Form’ jong ka MRSSA,” u la ong.
“Dei na kata ka daw ba ngi la mynjur ïa ka ha ka Ïingdorbar ha ka dur jong ka jingpynkylla, bad khatduh ïa ka ‘Amendment Bill’ la phah da u Lat (barim) sha ka tnad kam pohïing ka Sorkar Pdeng. Ngam shym la ong ba ngim shym la pyntreikam ïa ka MRSSA, ngi pyntreikam ïa ka hynrei ha ka liang ka aiñ, ngim lah ban buh ïa ki jaka-rung/jaka-mih naba kim don ki kyndon ha ka ‘Original Form’ jong ka MRSSA.” la bynrap shuh-shuh u Bah Tynsong.
