Shillong, K’Lyngkot 27
Ki pulit ka East Garo Hills ki la ïoh ban kurup bun bah ki tiar ïaleh kynthup ki tiar pynbthei na kawei ka khlaw ha ka jingkhynra ha ka step jong ka 25 tarik mynta u bnai hajan ka shnong Dura Bawegra.
U Superintendent of Police (SP) East Garo Hills u la pyntip ba ïa ka jingkhynra la pynlong ha ka por kumba 1:00 baje mynstep hadien ba la ïoh jingtip ba thikna.
Ha ka kynhun ki Pulit ba leit khynra la don lang u Superintendent of Police, Additional Superintendent, ki heh ophisar jong ka tnad Pulit East Garo Hills bad ki Pulit ka Special Operations Team (SOT).
Ha katei ka jingkhynra, ki Pulit ki la lap ïa shibun ki tiar ïaleh bad ki tiar pynbthei kiba la tep bha hapoh khyndew ha katei ka jaka.
La suba ba ïa kine ki tiar ïaleh lah ban buhrieh da ki dkhot jong ki seng lehnoh barim, kynthup ka Garo National Liberation Army (GNLA) bad ka United Liberation Front of Asom (ULFA).
Ki tiar kiba la ïoh ban kurup ki kynthup kawei ka suloi AK-56, AK magazine, lai tylli ki pistol kiba don ar tylli ki magazine, kawei ka suloi shna hi, 7 tylli ki tiar shna bom, 99 tylli ki kuli AK 7.62, 4 round ki kuli 7.65 mm, 50 tylli ki electric detonators, 11 tylli ki shotgun cartridges, 1 bom IED bad 3 tylli ki pressure cooker.
Ïa u bom IED la lah ban pynlip noh da ki pulit Bomb Squad ka East Garo Hills.
Hadien ba la ïoh kurup ïa ki tiar ïaleh, ki Pulit kila Register Case ha thanad Williamnagar lyngba ka Case No. 04/2026 hapoh ki kyndon Sections 25(1A) bad 25(1B) jong ka Arms Act bad Section 5 jong ka Explosive Substances Act.
Ka jingtohkit kaba kham bniah ka dang ïaid mynta ban lap ïa kiba donkti ban buhrieh ïa ki tiar ïaleh bad ban lap ïa ki jingïadei kiba lah ban don bynta bad ki kynhun lehnoh.
