Shillong, K’Lyngkot 27
U Nongïalam ka Khasi Students’ Union (KSU) u Samla Lambokstarwell Marngar u la ong ba ka KSU kam ju kyrduh ïa ki nongïalam bad shen kan sa pynlong ïa ka jingjied bad ban pynthymmai ïa ki nongïalam ka sengkmie.
Ïa kane u la pynpaw ha ka jingkren sha ki nongthoh khubor ha ka sngi Saitjaiñ hadien ba la wai ka jingïalang bah jong ka CEC kaba la long ha Community Hall NEHU Shillong.
U Samla Lambok u la ïathuh ba ka KSU ka la rai ba ha ka taïew ba khatduh jong u bnai Rymphang lane ka taïew ba nyngkong jong u bnai Lber kan sa pynlong ïa ka jingjied ïa ki nongïalam ka CEC kaba long shisien ha ki lai snem bad kaba long katkum ka riti treikam jong ka seng.
Haba kylli ïa u Samla Lambok, hato la un dang bteng ne em ban long kum u President bad u samla Donald V Thabah kum u General Secretary, u la kyntait ban jubab ïa kane da kaba ong ba dang bun ki mat ba ym pat long ban pynpaw pyrthei bad ïa kane yn sa ïakren kham hadien.
“Ha ka samoi treikam ka seng ka ju don, ki ban dang ïakhun bad kin don ki ban shongthait noh bad kan don sa kawei ka CEC kaba ngin dang ïakren sani bha ïa kane, hynrei ïa kaba mynta nga tharai ngam pat lah ban batai ïa kata, ailad shwa ïa ka CEC ban ïa shong ban rai” la ong u Samla Lambok.
Kum ban shu kdew, u samla Lambok bad u Samla Donald ki la ïalam ïa ka KSU kumba la khyndai snem tam eiei kata naduh u snem 2017 lyngba ki samoi treikam 2017-20, 2020-23 bad 2023-26.
