Shillong, K’Lyngkot 27
Ka Meghalaya ka la ïakhun tyngeh na ka bynta ban pynïakhaid kylla pyrshah ïa ka kynhun ba khlaiñ bor ka Services da mar 2-2 kol ha ka jingïa-khun kaba lai jong ka Group-B ha ka National Football Championship na ka bynta ka Santosh Trophy 2025-26 kaba la long ha ka sngi Ba-ar ha Silapathar, Assam.
Kane ka jinglah ban pynïakhaid ka la wan urlong lyngba ki ar kol ba la thep da u Deibormame Tongper (45+1 & 64) hadien ba ka Services ka la thep ar kol kham hashwa da Jijo Jerone (20) bad u Abhishek Pawar (34).
Kane ka kynhun ïaleh-kai ka Jylla ka la ïakhun tyngeh haduh kaba ar watla ka la duh noh ïa uwei na ki rangïalehkai u Dawanchwa Carlos Chal-lam uba la shah sei da ar tylli ki yellow card hashwa ban kut ki 15 minit.
Kumba ka paw ka Meghalaya ka la ïakhaid bad ka Punjab ha ka 24 tarik mynta u bnai bad ha ka jingïalehkai kaba nyngkong ka la jop ïa ka Odisha. Ha kane ka jingïa -khun kaba lai kane ka kynhun hapoh ka jingïa-lam u Bah Khlaiñ Pyrkhat Syiemlieh u la wanrah ïa kiwei pat ki rangïalehkai kiba kynthup ïa u Meba-naibok Kharbudnah bad u Robertson Khongriah kiba la mih ha ka jaka u Wanboklang Lyngkhoi bad u Babysunday Marngar.
Ka Services ka la ïoh ban pynkhih jar lyngba ka free-kick ba la ïoh da u Jijo. Ka Meghalaya ka la ïoh ïa ka kabu kaba biang eh ban pynïakhaid kylla ïa ka Services lyngba ka penalty ha kaba u Meban-khraw Wahlang u la ïoh ban shut ha ka minit kaba 30, hynrei u rangapkol ka Services u Gagandeep Singh u la lah ban pyllait na ka jingshah thep.
Kane ka jingbym lah ban thep kol ka la buh jingeh ïa ka Meghalaya bad tang hadien saw minit ka Services ka la ïoh ban thep biang ïa ka kol kaba ar lyngba u Abhishek hadien ba u la ïoh ban pyndep da ka khlieh hapoh ‘box’.
Hapdeng kane ka jingshah thep, ki rangïalehkai ka Meghalaya kim shym la kynran dien ha kaba ki la ïakhun tyngeh bad hashwa ban kut ka jingïa-lehkai jong ka kylla step ka la lah ban pynurlong lyngba u Deibor. Kane ka la wan urlong lyngba u Owanijuh Pajuh uba la ïarap pynbud bad u Deibor u la ïoh ban thep da ka khlieh. Te kumta une u rangïalehkai u la long uba lai ban thep kol da ka khlieh.
Kane ka jingïoh ban thep kol da ka khlieh ka la ïai bteng ha kaba u Deibor u la lah ban pynurlong biang sa shisien hadien ba u Robertson u la shut ïa ka ‘corner’ ha ka kylla miet na ka bynta ban pynïakhaid kylla ïa ka Services.
Hapdeng kane ka jingïakhun, ka Meghalaya ka la hap ban ïalehkai sa tang shiphew ngut na ka daw ba u Dawanchwa Challam u la shah beh noh na madan ha ka minit kaba 77 na ka daw ba u la ïohpdiang ïa ar tylli ki yellow card.
Lyngba kane ka jingïa-khaid, ka Meghalaya ka la kamai 5 poiñ bad ka la hiar sha ka kyrdan balai hadien ba ka Railways ka la jop ïa ka Punjab da 2-0 kol ha kane kajuh hi ka sngi. Kumba ka paw ka Railways bad ka Megha-laya ki la kamai mar 5 poiñ hynrei ka jingïapher ka long ha ka jingthep kol (+2 la +1). Ki saw tylli ki kynhun ki ban wan ha ki kyrdan ba kham shakhmat na baroh ar tylli ki group kin ïoh rung sha ka quarter final.
Te kumta ka Megha-laya kan pynkhreh ban ïakhun pyrshah sa ïa ka Kerala ha ka sngi Palei ha ka por 2 baje nohphai sngi ha Silapathar. Ka Kerala ka la jop ïa ka Odisha da 1-0 kol hynne ka sngi bad ka la kamai 7 poiñ na ki lai sien ïakhun.
