Dhaka, K’lyngkot:
Uwei u nongpynrung kam u la pynbor ia u Maksudur Rahman ban iehnoh ia ka shnong trai jong u ha Bangladesh bad ban leit da ki hajar mile sha ka ri Russia kaba khriat bha na ka bynta ka kam kum u nongpynkhuid.
Tang hapoh katto katne taiew, u la shah phah tur sha ka laiñ ba hakhmat eh jong ka tnat shipai ka Russia, kaba leit ban hiar thma pyrshah ia ka Ukraine. Ka jingtohkit jong ka Associated Press ka la lap ba ki nongbylla na Bangladesh ki la shah khring ban leit sha Russia hapoh ka jingkular lamler ba kin trei kam bylla hapoh ki kontrak shimet, hynrei ynda ki la poi sha Russia ki la shah phah tur pynban sha madan thma, ha ka jingleit hiar thma jong ka Russia sha Ukraine.
La ioh an iakren bad lai ngut ki shynrang na Bangladesh, kiba la lait phet na ki shipai jong ka Russia, ba kynthup ia U Rahman, uba la iathuh ba hadien ba ki la poi ha Russia, la bthah ia u bad ia ka kynhun ki para nongbylla na Bangladesh, ba ki dei ban soi ia ki kot- ki sla jong ka Russia, kiba la paw ba ki dei ki kontrak shipai.
La rah ia ki sha ka jaka sah jong ki shipai ban shah hikai pyntbit ha ka kam ïakhun thma da ki drone, ki rukom pynkynriah ia ki nongsumar bad ki buit ïakhun thma ba kongsan da kaba pyndonkam ia ki tiar ïakhun kiba heh bad ba khlaiñ bor.
