Shillong, K’Lyngkot 27
U Myntri ka Sorkar Jylla Bah Sanbor Shullai u la pynpaw ïa ka jingsngewkhia ïa ka jingkiew palat pud ka bai wai jaka hapoh Shillong Cantonment Area (SCA) bad buh jingkylli halor ka jingpynkheiñ ïa ka hok ban ïoh bynta lang kumjuh ne ka Right to Equality, haba ïanujor bad ki jaka ba marjan jong ka Municipal.
“Kam lah ban don artylli ki rukom lum khajna kaba ïapher ha ka Cantonment bad Municipal Area,” ong u Bah Sanbor.
U Bah Sanbor u la ïalam ïa ka kynhun ki nongïalam ka BJP sha New Delhi, ha kaba kila ïakynduh ïa u Myntri Khynnah ka Sorkar Pdeng uba khmih ïa ka tnad Defence u Sanjay Seth bad ïa ka Director General jong ka Defence Estate ka Shoba Gupta.
U la aiti ïa ka jingthoh ha kaba ïadei bad ka jingkiew palat pud jong ka khajna ha ka Cantonment Area hadien ka jingpyntreikam ïa ka Polisi treikam kaba shipor.
“Ngi kyrpad ïa ka Ministry ban pynkylla noh ïa ka polisi treikam kaba shipor bad ban pyntreikam ïa ka 25% jong ka jingkheiñ lyngba ka STR jong kito kiba lah ïoh lypa ïa ka Lease,” ong u Bah Sanbor ha ka jingthoh.
U la ban jur ba ka jingkiew palat pud ka bai wai kala lam ha ka ban don ki mukotduma ban sahteng ha ka Supreme Court bad ki High Court bapher bapher hapoh ka ri.
U la pynpaw ba ka Sorkar ka dei ban thaw ïa ka polisi kaba thikna ba ka bai wai kan long kaba ïaryngkat bad ki jaka kiba marjan jong ka Municipal Area. Kane ka kynhun ha ka jingïalang bad ka Director kila kyrpad ban pyntreikam noh mardor ïa ka Building Bye Law bad ban pynkloi ïa ka jingbhah ïa ka Reservoir ne jaka pynlang um kaba 6 lak litar ban pyndap ïa ka jingdonkam ha ka thaiñ Shillong Cantonment Area.
U Bah Sanbor u la khot sngewbha ruh ïa u Myntri Khynnah ka Sorkar Pdeng ban buh ïa u mawnongrim na ka bynta ki projek bapher ki ban sa wan, ka ban long syndon ka histori ha ka Cantonment Area.
