Shillong, K’Lyngkot 28
Ïa ka kot lum thup ba bniah ne ka ‘Nomination Dossier’ jong ka India, “Jingkieng Jri/Lyu Chrai Cultural Landscape, Meghalaya” la aiti da u HE Vishal V. Sharma, u Nongrah’tien Syiem /Permanent Representa-tive ka India sha ka UNESCO sha u Lazare Assomo Eloundou, Director ka World Heritage Centre ka UNESCO na ka bynta ban pyrkhat halor ka jinglah ban shah pynrung ha ka thup ‘World Heri-tage’ jong ka UNESCO ha ka jingkhmih bniah jong u snem 2026-27.
U Nongrah’tien Syiem, u Vishal V. Sharma haba aiti ïa kane ka kot lum thup, u la ai khublei ïa u Myntri Rangbahduh ka ri, u Narendra Modi, Myntri ka tnad Lariti ka Sorkar Pdeng, u Gajendra Singh Shekhawat, Myntri Rangbah ka Jylla, u Conrad K. Sangma, Principal Secretary, Bah F.R. Kharkongor, ophisar ka Archaeological Survey India, tnad kam bar-ri ka Sorkar Pdeng, ki ‘riewshemphang bad ki paidbah nongshong shnong kiba ri ba sumar ïa kane ka jaka ba shah jied ba don jingïadei bad ka histori.
Kane ka jaka ba la jied kaba don ha kylleng ka Ri-lum Khasi bad Jaiñtia jong ka Meghalaya, ka pyni ïa ka kolshor kaba im bad ba kyrpang ba la pynwandur ha ki spah snem da ki jaidbynriew trai-ri Khasi bad Jaiñtia.
Ha kajuh ka por, kane ka jaka ka pynpaw ïa ka jingïadei kaba la suhthied hapdeng ki briew, ka mariang, bad ka jinglong mynsiem ha ki rukom long tynrai ka riti-dustur jong ka jingpyndonkam ïa ka khyndew, ka synshar-khadar, bad ka jingsumar ïa ka mariang.
Hapdeng jong kane ka jinglong-jingman kolshor, ka dei ka jingpyrkhat pyrthei (tynrai) kaba la pynshong nongrim ha ki nongrim jong ka jingburom, ka jingai kylliang bad ka jingkitkhlieh ïa ka Mei Ramew.
Ka jingaiti ïa kane ka kot ne ka ‘Nomination Dossier’ ka pynpaw ïa ka jingangnud ka India ban ithuh bad pynneh-pynsah ïa ka kolshor bad ka pateng mariang ba riewspah jong ka, khamtam eh ïa ki riti-dustur ba im bad ki jingstad jong ki jaidbynriew trai-ri kumjuh ban ïaid shakhmat bad ki jingpyrshang ban pynneh-pynsah ïa ki pateng pyrthei lyngba ka UNESCO.
