Tura, K’Lyngkot 28
Ki nongshong shnong ka Tura khamtam ki jaidbynriew Garo kila kyndit thret ha ka sngi Ba-ar hadien ka jingdon jong ki poster ba la tah ha ki post ilektrik ha Tura ha ka kyrteng ka kynhun lehnoh ISIS-K kaba byrngem ïa ki paid Garo ba ki dei ban mih noh na ki katto katne ki jaka ka West Garo Hills.
Ïa kane ka poster la lap na madan New Tura Matchokolgre, marjan ka Law College kaba don ha Araimile, West Garo Hills.
Katkum kane ka poster, “Ka khubor ka long ïa ki paid Garo kiba sah ha West Garo Hills bad ki jaka them kynthup ïa ka Phulbari, Rajabala, Tikrikilla, Selsella, Garobadha bad Tura ba ki dei ki jaka jong ngi. Lada phi ïa ieid ïa la ka jingim, mih noh na ka jaka jong ngi hapoh u 2027. Ngi la wan. Mih noh na ka jaka jong ngi shuwa u snem 2027, lem kumta…..”ong ka poster ba la ai ha ka kyrteng u Aminur Islam, Plain Belt Area Commander.
Katkum ka khubor na ki pulit la ong ba kane ka poster ka don ïa ka jingthoh ba ai kyrteng “Jingmaham ïa ki Garo”, kaba byrngem ïa ki paid Garo bad hukum ba kin dei ban mih noh na ki katto katne ki jaka ka West Garo Hills kynthup ïa ki jaka them bad ka Tura hapoh u snem 2027. Kane ka poster kala kam ïa ka jinglong trai ïa ka jaka bad buh ruh ïa ka por ban mih.
La ong ba ïa kane ka poster, la lap tang ha ka thaiñ Araimile ym sha kiwei-kiwei pat ki jaka jong ka district. Ki pulit ki suba ba ïa kane ka kam la leh da ki riew khwan myntoi da ka jingthmu ban wanrah ïa ka jingtieng jingsmiej bad pynheh ïa ka jingïakynad ba don ha ka thaiñ. Ïa kane ka poster yn sa phah ban leh test forensic. Ka video bad ki dur jong kane ka poster kala saphriang ha ki rynsan social media, kaba la pynkhuslai jur ïa ki nongshong shnong. Haba ïoh jingtip, ki pulit kila hiar mar-mar sha katei ka jaka bad kila tar noh ïa kane ka poster.
Halor kane, ki pulit kila register da ka case ha thanad Araimile bad ka jingtohkit mynta kala ïaid shakhmat ban lapdien ïa ki briew bad pynthikna ïa ka thymmei jong kane ka kam.
Ki bor pahara kila pynkhlaiñ bha ïa ka jingpeitngor kum shibynta ban ïada na ki kam bymman.
