Shillong, K’Lyngkot 28
Ka jingtyrwa ka Sorkar Jylla ban pynmih da ka kyndon kaba ïasyriem kum ka Inner Line Permit (ILP) ban pynrung hapoh ka Immigration of Foreigner Act 2025, ka la pynlong ïa ki Sengbhalang bapher-bapher ban pynpaw ïa ka jingpyrshah bad dawa ba dei ban pyntreikam beit da ka ILP.
Haba ïadei bad kane ka mat ka Hynñiewtrep Integrated Territorial Organization (HITO) lyngba u President u Bah Donbok Dkhar ka la pynsngew sha ka Sorkar Jylla da kaba ong ba kane ka jingleh ka Sorkar ka long tang ban pynthame paidbah.
Haba ïakren sha ki nongthoh khubor ha ka sngi Balang u Bah Donbok u la kdew ba dang shen u Myntri Rangbah bad ki Symbud Myntri Rangbah ki kwah ïa ka jingpynkylla thymmai haba ïadei bad ka Foreigner Act, hynrei u la ong, ha u snem 2013 ka ri bad ka jaitbynriew ka la ïakhih na ka bynta ban dawa ïa ka ILP bad ka Sorkar u Mukul Sangma ka la pynkylla ïa ka ILP, da kaba ong ba ka MRSSA ka dei kaba la wanrah ha ka jaka jong ka ILP bad ong ba ka dei kaba kham khlaiñ bor ban ïa ka ILP.
Nalor kata u la ong ba lada ka Sorkar kam lah ban wanrah ïa ka ILP, kam dei shuh ban dang pynthame ïa u paidbah, ha kaba u paidbah u la sakhi ha u snem 2013 kumjuh ka MRSSA ruh ka khlem treikam.
Shuh-shuh u la ong “Kumno u paidbah un dang shaniah ïa ka Sorkar kaba dang kwah shi kwah ban pynkylla ïa ki aiñ, hynrei khlem da lah ban pynbha pynjanai ïa ki aiñ kiba la don”.
Haba kaba ïadei bad ka lynti rel, u Bah Donbok u la ong ba ka jingkwah ban wanrah lynti rel ha ka Jylla kam dei na ka bynta ka roi ka par bad jingmyntoi u ba bun balang, hynrei ka dei ka jingpyrkhat ïa ka jingmyntoi shimet jongno re jongno.
Haba bynrap ïa kane u la ong ba ha kine ki sngi, la ïohi ba ka rel ka kit dewïong ha Garo Hills, kane ka jingkwah ban wanrah ïa ka rel haduh Khliehriat lane Jowai ka long ba kin lah ban kit dewïong tang ban ïoh pynsuk ïa ka kamkhaïi, namar ba ha ki lynti ki syngkien la bun palat kiba khrong bad kiba pynwit shane shatai, la kynnoh u Bah Donbok.
