Shillong, K’Lyngkot 28
Kumba ju long man la u snem, shibynta ban tehsong ban don ka jingïajan hapdeng para nongdie kot khubor, ka seng ki nongdie kot khubor ba ha nongbah Shillong ka ju pynlong ïa ka jingbam khana sngewbha ba shisien shisnem ha ka 27 tarik u bnai Kyllalyngkot.
Ha kane ka snem U Nongsaiñ Hima u la ïoh ban sakhi lang ïa kane ka jinglehkmen leh sngewbha ki nongdie kot khubor, kaba ki la pynlong hapdeng ka jingkmen jingsngewbha ryngkat ki khun ki kti jong ki.
Ka long kaei-kaei kaba sngewtynnad ban ïohi ïa ka jingïatylli bad sngewthuh jingmut jong ki, kumba don ka jingong ba “ka jingtylli, ka long ka bor”.
Haba ïoh ban ïakren, ïa khana shaphang ka kam kaba ki trei, watla ka dei ka kam kaba rit hynrei ki pynpaw pat ba ka lah ban pyndap pynbiang ïa ki jingdonkam ha ïing ha sem, ki lah ban bsa skul ïa ki khun bad kumta ter-ter.
Kaba kham pynsngewtynnad shuh-shuh ka long ba ki pynpaw ba ki suk ki kmen, ki im ka jingim kaba palei mynsiem, ki hun ïa ka jingïoh kaba rit bad pynpaw ba ka jingïoh jong ki ka kyrsoi ban pyndap ïa ki jingdonkam ha ïing ha sem.
La ïoh ruh ban ïakren ïa u nongïalam ka Meghalaya Newspaper Hawkers & Vendors Association (MNH&VA) u Bah Sebastian Shabong u ba la ïathuh ïa ki kam ka Association, ba ka ju ïarap ïa kiba para dkhot haba ki kynduh ka pang ka shitom bad ju ïarap ruh haba jia kano-kano ka jingjia ba sngewsih.
U la bynrap ruh ha kine ki sngi, ki khun samla ki la kham sngewtynnad ban pynlut por ha ka ban peit Mobile ban ïa kaba pule ïa ki kot khubor bad pynpaw ba dei tang ki riew tymmen kiba dang smat bha ban pule ïa ki kot khubor.
