Jerusalem, K’lyngkot:
U Myntri Rangbahduh ka Israel, u Benjamin Netanyahu, ha ka Sngi Balang u la ong ba ka jingpynlong ia ka ilekshon ha kum kane ka por ba mynta, kan long ka “jingbakla” kaba khraw, namar ba u iakynduh ia ka jingma ha ka liang ka jingthep vote lada jia ba um lah ban pynlong aiñ ia ka mang tyngka jong ka ri.
Ka mang tyngka kan don ka jingpule bad jingai jingkheiñ kaba nyngkong ha ka Sngi Balang ha iing dorbar jong ka Israel, ha kaba ka kynhun synrop jong u Netanyahu ka lah tang ban pyndonkam ia ka jingbun paid da ka jingainguh ka jingiatreilang kaba khlem thikna jong u paralok barim.
“Hooid nga sngewkhia… Nga tharai ba ngi don ha ka jingeh kaba khraw bha”, la ong u Netanyahu ha ka jingialang bad ki nongthoh khubor ha ka telebishon.
Lada ym lah ban pynlong ia ka mang tyngka haduh ka 31 tarik u Lber kan pynmih ia ka elekshon kaba kloi.
“Nga tharai ba kaba khatduh eh kaba ngi donkam mynta ka dei ka elekshon. Ngin sa don ia ka elekshon hadien mynta u snem, hynrei nga tharai ba ka long kaba bakla ban don mynta” u la ong.
Ka elekshon ka dei ban long hapoh u bnai Naiwieng.
U nongïalam jong ka Likud, ka seng ba kongsan jong ka liang ka diang jong ka Israel, u Netanyahu, u bat ïa ka rekod jong ka por ba u la shakri slem tam kum u myntri rangbah duh jong ka Israel — palat 18 snem baroh ha ki katto katne ki por naduh u snem 1996 — bad u la dep pynpaw ba u thmu ban ïakhun biang.
Ha ka elekshon ba la dep, ka Likud ka la jop 32 tylli ki seat ha ka Knesset, ki paralok ultra-Orthodox jong ka 18 tylli, bad ka kynhun ba sha ka liang ka diang tam 14 tylli.
Katto katne na ki paralok ultra-Orthodox jong u Netanyahu ki la mih noh da kaba thikna na ka sorkar jong u ha u snem ba la dep, hynrei na ka bynta mynta ki kyntait ban pynhap noh ïa ka.
Hynrei ki sngew artatien ban thep vote ia ka mang tyngka tad haduh ba u myntri rangbah un pyndep ia ka jingkular ban thaw ia ka ain kaba ailad ia ka imlang sahlang jong ki ban kiar na ka jingshah pynrung shipai.
Ka samoi treikam jong u Netanyahu mynta ka la sdang na ka plan ban pynkylla ïa ka aiñ kaba la pynmih jingïakynad kaba la pynmih ïa ki jingïakhih paidbah da ki bnai, ha kaba da ki phew hajar ngut ki nong Israel ki la mih sha surok la jan man ka sngi.
