Shillong, K’Lyngkot 28
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong ha ka Sngi Balang u la pyntikna ba ka Sorkar kan leh ïa kaba donkam ha kaba ïadei bad ka ‘Poster’ jong ka ISIS-K kaba maham ïa ki Garo ban mih noh na ki jaka jong ki.
“Ai ba ka Sorkar kan leh ïa kaba donkam hynrei ngin pyntikna ba kum kane kam dei ban jia,” ong u Bah Prestone haba kren sha ki nongthoh khubor.
U Bah Prestone u la batai ïa kane ka kam kum “kaba hap ban shimkhia bha” bad pynbna ba yn sdang mardor ïa ka jingtohkit.
“…kane ka dei ka mat kaba hap ban shimkhia bha. Dei na kata ka daw ba nga ong ïa phi ba ka jingtohkit kan sdang mardor,” u la pynpaw.
Ha kaba ïadei bad ki jingdawa ban don ka jingtohkit na ka Sorkar Pdeng, u Bah Prestone u la ong, “Nyngkong eh, ngin peit shuwa. Shubuh mynta lada ka jingtohkit jong ka Jylla ka sngew ba donkam ruh ïa ka jingdon bynta lang jong ka Sorkar Pdeng, ngi long kiba kloi ban leh ïa kata.”
Haba kylli shaphang ki khwan myntoi kiba lah ban don sha lyndet jong katei ka jingjia, u Bah Prestone u la ong, “Ngam lah ban ong mynta namarba ka dang kloi eh ban ong eiei. Kumta to ngin ap bad ngin sa peit. Ngi la ïaid shakhmat bad ka kam (ban tohkit halor kane ka bynta).”
