Shillong, K’Lyngkot 28
U Symbud Myntri Rangbah ka Maharashtra bad Nongïalam ka Nationalist Congress Party (NCP) u Ajit Pawar u la khlad noh ha ka step sngi Balang hadien ba ka liengsuiñ kaba u shong, ka la hap bad bthei ha ka por ba ka dang pyrshang ban hiar kyrkieh ne ka emergency landing hajan Baramati, Pune district.
Katei ka liengsuiñ, kaba dei ka Learjet 45, ka la hiar ha ka por kumba 8:45-9:00 mynstep, katba ka dang hiar kyrkieh ha Baramati Airport. La ïohi ïa ka tdem kaba rben, ka ding bad ki jingtwa ha ka jaka ba la hap katba ki kynhun emergency ki dang leit sha katei ka jaka.
Katkum ka khubor, la ïathuh ba ki don 5 haduh 6 ngut ki briew kiba don ha katei ka liengsuiñ, ba kynthup ïa u Ajit Pawar, ki bor pahara jong u bad ki nongtrei jong ka liengsuiñ. La ïathuh ba baroh kiba don ha ka liengsuiñ, ki la khlad noh ha katei ka jingjia, la ïathuh ki bor pynïaid liengsuiñ.
U Pawar, uba don 66 snem ka rta, u dang mih na Mumbai, ban leit sha ka jingïalang ha Baramati, ka shnong trai jong u, ban ïashim bynta ha ki jingïalang saiñpyrthei, kiba la buh por ha shwa ka ilekshon Zilla Parishad.
Kane ka jingjia ka la wanrah ïa ka jingsngewsih kaba jur na ki nongïalam saiñ pyrthei ha kylleng ka ri, ha kaba ki jingai burom ki la tuid na ki paralok bad ki nongïaleh pyrshah kumjuh. Ka jingtohkit halor ka daw jong ka jinghap liengsuiñ ka dang ïaid shakhmat bad ki bor synshar ki la khang pyrshah ïa katei ka jaka, katba ki riew shemphang ha ka liang ka jingshngaiñ ha ka liengsuiñ ki dang sdang ïa ka jingtohkit jong ki.
