Shillong, K’Lyngkot 28
Ki pulit ki la lap noh ïa ki ar tylli ki arshaka kiba la shah tuh dang shen na kawei na ki jaka ha Umphyrnai kaba hap ha East Khasi Hills.
Katkum ka khubor kaba la ïoh na ki pulit la ong ba u Krianbor Kharwar u la ai ka jingujor ba ha ka 25 tarik mynta u bnai ha ka por kumba 8 baje mynmiet, ki runar bym lah ban ithuh ki la tuh ïa ka arshaka ka jong u, kaba don ïa u Registration Number ML05-AB-7378 na ka shnong Shaid Umoid ha South West Khasi Hills.
Hynrei la ong ba ha ka 27 tarik mynta u bnai, ki pulit hadien ba pynlong ka jingtohkit, ki la lap ïa kane ka arshaka kaba la shu ieh kumto ha Umphyrnai.
Ha kawei pat ka khubor, u Jacob Lyngdoh u la ai ka jingujor ba ha ka 25 tarik mynta u bnai, ha ka por kumba 8 baje mynmiet, ki runar bym lah ban ithuh ki la tuh ïa ka arshaka ka jong u, kaba don ïa u Registration Number ML05-AF-4659 na ka jaka sah ka jong u ha Madanrting Thembasuk, Block-E, Shillong. Hynrei la ong ba ha ka 27 tarik mynta u bnai, ki pulit ki la lap noh ïa kane ka arshaka kaba la shu ieh noh kumta ha Umphyrnai.
Ha kawei pat ka khubor, u SDE, BSNL, Williamnagar u la ai ka jingujor ba ha ka 22 tarik mynta u bnai, ha ka por ba pynlong ka jingjurip ïa ki tower jong ka BSNL (ba la pynpra da ka NHAI na ka bynta ban shna surok) ha Wagopgre ha East Garo Hills, la lap ba ki runar bym lah ban ithuh ki la tuh ïa ki ar tylli ki ‘air conditioner’ kiba shongdor kumba T.40,000/-.
