Shillong, K’Lyngkot 28
Ka Khasi Students’ Union (KSU) Sengkmie ka la pynpaw ba ka Meghalaya Public Service Commission (MPSC) ha ka sien kaba nyngkong ka la sdang ban pyllait paidbah ïa ki mark jong ki samla ba pass ïa ki eksamin thep kam hadien ka jingdawa jong ka seng ban pyntreikam ïa ka kaiphod treikam (report) ba la bthah da ka “MPSC Reforms Committee, 2025”.
Ka Seng ka la pynkynmaw ba ha 19 tarik u Kyllalyngkot, 2026 ka la phah dorkhas bad la maham ba ka Commission kam dei ban pynslem shuh ban pyntreikam ïa kane ka kaiphod bad ka la ai por shi taïew ïa ka MPSC ban pynbeit pynbiang halor kane ka bynta bad na ka liang ka MPSC ha ka 23 tarik u Kyllalyngkot, 2026 ka la pyllait paidbah ïa ki mark jong kiba pass bad ïoh kam jong ka post Sub Inspector of Statistics under Directorate of Economics & Statistics. Kane ka long ka sien kaba nyngkong ba ka MPSC ka pyllait paidbah ïa ki mark bad ka long kum ka sienjam kaba nyngkong sha ka jingthung kam thung jam kaba khuid.
Na ki mat ba don ha ka kaiphod na ka liang jong ka MPSC ka la lah ban pynurlong ïa katto katne tylli ki mat kiba kynthup ban pynlait ïa ki answer key (jubab jong ki jingkylli hadien ka eksamin) bad ban ai por ban pyrshah lada don kano-kano ka jingbakla, jingthaw ïa ka Grievances Cell ban ujor lada don kano-kano ka jingbakla bad ha ka sien kaba nyngkong ban pyllait paidbah ïa ki mark bad kiwei ki mat kiba rit.
Hynrei ka Seng kam pat hun katba baroh ki mat kiba don ha ka kaiphod kim pat treikam lut.
Katkum ka kaiphod, ka MPSC kam dei ban pynmih tang ïa ki mark jong kiba pass hynrei jong baroh ki bym shym pass ruh bad ka MPSC kam shym la leh ïa kata.
Halor kata, ka seng ka pynkynmaw ba kiwei ki mat ba ka MPSC kam pat pyntreikam ki long, ha ki eksamin dei ban ai carbon copy jong ki OMR sheet sha ki nongthoh eksamin ba kin ïoh ban tip bad ïanujor ban nym don ba leh tuh bad ki mark jong ki.
Ban pynlait paidbah ïa ka jingdon jingem (declarations of assets & liabilities) man la u snem jong baroh kiba trei ha MPSC ba kynthup naduh u Chairman, ki member bad kiwei khnang ban lah ban tehlakam ïa ka jingbamsap.
Ban pyntip ïa ki mark jong ka Personal Interview lada don. Ban pyllait paidbah ïa ka kaiphod treikam (Annual Report) jong ka MPSC. Ban don ka Annual Calendar ka ban pyntip ïa ki nongwad kam halor ki tarik advertisement, eksamin bad result na bynta baroh shi snem. Jingpynkylla ha ki rukom shim interview. Advertisement kam ka dei ban dei thik tang ïa ki nongshong shnong ka Jylla bad kiwei-kiwei ki mat.
Na ka liang u Chairman ka MPSC hadien ka jingkut noh ka jingbuh por kaba shi taïew na ka liang ka Seng, u la pan por sa katto katne sngi ban pynbeit pynbiang ïa kiwei ki mat ba dang sah namar ka jingbun ki shuti ha kine ki 7 sngi.
Na ka liang ka Seng kan ai por sa katto katne sngi ïa ka MPSC ban pynbeit pynbiang ïa ki mat ba dang sah hynrei lada ym don ki jingkylla kiba biang na ka liang ka Seng kan shim ïa ki sienjam kiba kham eh pyrshah ïa ka MPSC bad lada donkam ban pynsangeh ruh ïa ki eksamin baroh ban nym don ki jingthep tuh bad jingleh tuh katba kine ki mat ba don ha ka report kim pat treikam.
Kane ka long katkum ka kyrwoh khubor ba la pyllait da u samla Reuben Najiar, Asst. General Secretary cum Chairman, Employment Monitoring Cell Khasi Students’ Union Sengkmie.
