Shillong, K’Lyngkot 28
Ka State-BJP ka la pynrem jur halor ka jingmih jong kawei ka ‘Poster’ ba dang shen kaba byrngem ïa ki jaidbynriew Garo ha West Garo Hills kaba la kynnoh ba la soi da ka ISIS-K bad kyntu ïa ka Sorkar Jylla ban shimkhia mardor ïa kito kiba donkti ha katei ka kam.
“Ka BJP ka kyntu ïa ka Sorkar Jylla ba kan shimkhia mardor, bad kyrpad ïa uwei-pa-uwei u nongshong shnong ka Jylla ban long kiba peitngor bad ban khang lad ïa ki jingthmu sniew jong ki runar na shiliang khappud,” ong u General Secretary ka BJP, Bah Wankitbok Pohshna ha ka Sngi Balang.
Ka seng ka la kyrpad ruh ïa ka Sorkar Pdeng ban shimkhia ïa katei ka jingjia bad pyntikna ba ki bor pahara jong ka ri ki long kiba lah ban tehlakam ïa kum kine ki jingbyrngem.
“Ka State-Unit jong ka BJP ka kyrpad ruh ïa ka Sorkar Pdeng ban shimkhia bad ka kwah ban pyntikna sha man la uwei-pa-uwei u nongshong shnong ka Meghalaya ba ki bor pahara jong ka ri ki long kiba biang pura ban pynduh-pyndam ïa kano-kano ka jingleh bymman na kum kine ki kynhun,” ong u Bah Wankitbok haba bynrap, “Ka jingkiew jong ki kam ‘Jihadi’ ka long la slem bah ka daw jong ka jingsngewkhia bad ïa kane ka jingeh la pynsniew shuh-shuh da ki khwan myntoi, ha kaba ïa ki nongwan buhai shnong be-aiñ la ailad ban ïaid laitluid bad ban pynlong jaka rieh ha ki jaka jong ngi na ka bynta ka jingmyntoi ilekshon – ka Congress kaba long ka nongsaiñdur ba kongsan ïa kane ka jingpynwandur mynta la palat sanphew snem.”
Ka BJP ka la kular skhem ban ïakhun pyrshah ïa ka jingwan buhai shnong be-aiñ bad ban ïada ïa ki trai-ri trai-muluk jong ka Jylla.
“Ka seng ka ju ïeng barabor kum ka kynroh ïa kane ka jingwan rung kyrthep ki nongbuhai shnong be-aiñ bad ki rukom treikam bapher-bapher kum ka SIR la dep ban pyndonkam ban pynithuh bad ban weng ïa ki nongwan buhai shnong nabar ri na ki jaka jong ngi. Ka seng ha Meghalaya ka ïeng skhem ha kane ka bynta bad ka kular ban ïakhun tad haduh ban da pynithuh bad weng ïa u nongbuhai shnong be-aiñ ba khatduh eh,” la ong u Bah Pohshna.
U la ong ruh ba ka State-BJP ka ngeit ba kane ka dei ka jingmaham ym tang ïa ki hymmen ki para Garo (jong ngi) hynrei “ïa ngi”, ki Khasi bad Jaiñtia kumjuh, bad ka Jylla baroh kawei ka dei ban ïamih paidbah ban ïada ïa uwei-pa-uwei u nongshong shnong.
“Watla ym pat lah ban tip ïa ka tynrai, watla ngi tikna ba ïa ki runar yn sa kem noh shen, hynrei ka khubor ha lade hi ka kit ïa ka jingpyrkhat kaba jylliew bad kaba pynkulmar jingmut kaba ktah beit-beit ïa ka jingim jong ki trai-ri trai-muluk. Kane ka khubor ka kdew ïa ka jingthmu kaba shai jong ki nongïasylla ban pynrung ha ka jingmut ki samla, ban rat dyngkhong ïa ki nongshong shnong trai-ri trai-muluk ka Jylla bad ban bujli ïa ki da ki nongbud Jamat na sha shiliang khappud. Ïa kane ym dei ban shah satia ban jia,” u la ong.
Shuh shuh, ka BJP ka la khot la wer ïa ki nongshong shnong ban ïatylli lang bad ban wanrah ïa ka kynhun kaba ïatylli pyrshah ïa kane ka jingma, da kaba ban jur ba ïa kum kine ki jingpyrshang ban pynrung ïa ki jingmut ba sniew ha ki samla bad ban pynsakma ïa ki trai-ri trai-muluk yn ym shah da lei-lei ruh.
