Shillong, K’Lyngkot 28
U Marcuise N Marak uba dei u Myntri Sorkar u la pynrem jur halor ka poster ba byrngem ïa ki paid Garo ba kin mih noh na ki jaka jong ki, kaba la thoh ha ka kyrteng jong ka ISIS-K.
“Kum u nongmihkhmat ka Jylla, hynrei nyngkong, kum u nongshong shnong, bad kum u dkhot ka jaidbynriew Garo, nga pynrem jur ïa kane ka kam pyntieng pynsmiej bad jingbyrngem pyrshah ïa ki jaka jong ngi, ïa ki briew jong ngi bad ïa ka shongsuk shongsaiñ,” ong u Marcuise ha ka kyrwoh khubor ba la pyllait.
U la ban jur ba ka Meghalaya ka ïeng na ka bynta ka jingïatylli, ka jingïaburom markylliang bad ka jingïalong kawei jong baroh ki jaidbynriew.
“Kum kine ki jingpyrshang ban pynsaphriang ïa ka jingtieng jingsmiej bad ka jingpynïapait ïapra kam don jaka satia ha ka imlang sahlang jong ngi,” ong u Myntri haba bynrap “Ka Meghalaya ka ju ïeng beit ha ka jingïatylli, ka jingïaburom markylliang bad ka jingïalong kawei jong baroh ki jaidbynriew, kam pher ïa ka jingïapher niam ne jaidbynriew”.
“Ki bor District kila pynkhlaiñ bha ïa ka jingpeitngor bad jingtohkit ban lah pynithuh bad leh eiei pyrshah ïa ki briew kiba donkti ha kane ka kam be-aiñ,” u la bynrap.
