New Delhi, K’lyngkot:
Ki la don kumba hynriew tylli ki skul jong ki riewshimet ha Gurugram kiba la ïoh ïa ki email byrngem buh bad pynbthei bom ha ka step jong ka sngi Balang, kaba la pynlong ïa ki ban pynkynriah ïa ki briew kiba bun bad ban peit bniah ïa ki bor pahara, la ïathuh ki pulit.
Ïa kine ki jingbyrngem la ïoh ha ka por 7:10 baje mynstep, ha ka por ba ki khynnah pule ki dang thmu ban poi ha ka jaka pule. Mar mar ki bor pynïaid skul ki la pyntip sha ki pulit bad ki la kyrpad ïa ki kmie ki kpa ba kim dei ban phah skul ïa ki khun.
Ki khynnah pule kiba la poi hadien ba la ïohpdiang ïa kane ka khubor pyntriem, la phah biang da kaba suk.
Ki kynhun pulit, ki kynhun pynlip bom, ki pulit jong ka SDRF bad ki ksew smadien ki la shah pyntreikam ha kylleng ki jaka pule, bad la pynlong ïa ki jingwad bniah kiba jur.Ym shym la lap ïa kiei kiei kiba suba haduh mynta, la ong ki heh sorkar, da kaba bynrap ba dang buddien bha ïa ka jinglong jingman.
Ki skul kiba la shah byrngem ha Gurugram ki kynthup ïa ka skul Kunsakpalan (DLF Phase-1), Lancers International School (Sector 53), Heritage Experiential Learning School (Sector 64), Shiv Nadar School (DLF Phase-1), Shri Ram Aravali School, bad ka Pathways World School kaba don hajan Badshahpur.
Ha kajuh ka por, katto katne tylli ki skul ha Chandigarh ruh ki la ïoh ïa kitei ki email kiba byrngem pynbthei bom ha ka sngi Balang. La pynkynriah noh ïa ki khynnah pule bad ki nongtrei kum ka jingïada, bad ki pulit ki la pynlong ïa ka jingtalasi kaba bniah ïa katei ka jaka. La pynkhlaiñ bha ïa ka jingpahara ha kylleng ki skul kiba shah ktah.
