New Delhi, K’lyngkot:
Hadien ka jingbna khubor jong ka jingkhlad kyndit jong u Symbud Myntri Rangbah jong ka jylla Maharashtra, u Ajit Pawar bad saw ngut kiwei pat ki briew, na ka jinghap ka liengsuiñ kaba kit ïa ki, ha Pune distrik, ha ka step jong ka sngi Balang, ki nongmihkhmat na kylleng ki seng ki la pynpaw ïa ka jingkyndit bad jingsngewsih halor kane ka khubor.
Ka President ka Droupadi Murmu ka la pynpaw ka jingsngewlem halor ka jingkhlad noh jong u Ajit Pawar, ha kaba ka la ong ba ka jingkhlad khlem dei por jong u ka dei ka jingduh kaba ym lah ban pynbha pat.
U Myntri Rangbahduh ka ri u Narendra Modi u la pynpaw ïa ka jingsngewlem, da kaba ong “U Ajit Pawar u la long u nongïalam jong ki paidbah uba don ka jingïadei kaba khlaiñ bad ki.”
U nongïalam ka liang pyrshah ha Lok Sabha u Rahul Gandhi u la ong ba ka khubor halor ka jingkhlad noh jong u Ajit Pawar bad kiwei pat kiba don lang ha ka liengsuiñ ka long ka khubor kaba pynsngewsih haduh katta katta.
Uwei pat u Symbud Myntri Rangbah jong ka Maharashtra, u Eknath Shinde, u la batai ïa ka jingkhlad noh jong u para Symbud Myntri Rangbah jong u, u Ajit Pawar, ba ka long kaba sngewsih bad kaba pynkthang bad ong ba ïa kane ka jingjia hap liengsuiñ kaba la shim ïa ka jingim jong u, yn sa tohkit bniah.
Na ka liang u Myntri ka sorkar pdeng u Nitin Gadkari u la ong ba u ïasam ïa ka jingïadei shimet kaba jan bha bad u nongïalam jong ka Nationalist Congress Party (NCP). Ha ka jingthoh ha ka rynsan X, u Gadkari u la ong ba ka khubor jong ka jingkhlad khlem por jong u Pawar ha katei ka jingjia aksiden ka long kaba sngew shyrkhei haduh katta katta, kaba sngewsih, bad kaba pynmong ïa ka dohnud.
U Myntri Rangbah ka Tamil Nadu, u M K Stalin, u la sngewlem halor ka jingkhlad noh jong u Pawar, da kaba ong, “ka jingshyrkhei jong kane ka jingjia ka long ka bym lah ban pdiang”.
Shuh shuh nalor kine, na ka liang u Arvind Kejriwal, u nongpynïaid jong ka seng Aam Aadmi Party, ha ka jingthoh ha ka rynsan X, u la ong ba katei ka khubor ka long kaba sngewsih haduh katta katta.
“To ai ba uba donbor baroh Un ai ka jingsuk ïa ki mynsiem jong kiba la khlad noh bad ai bor ïa ki bahaïing hasem bad ka jingpyntngen na ka bynta jong ki ha kum kine ki kynta ba ki mad ïa ka jingsngewsih,” u la ong.
U Myntri Rangbah ka Uttar Pradesh, u Yogi Adityanath, ha ka jingthoh ha ka rynsan X, u la ong, “Ka jinghap liengsuiñ kaba sngewsih ha Baramati, Maharashtra, kaba la wanrah ïa ka jingkhlad noh khlem por jong u Symbud Myntri Rangbah ka Maharashtra, u Ajit Pawar bad kiwei kiwei ki dkhot, ka long kaba pynpait dohnud bad pynpait mynsiem haduh katta katta.”
Shuh shuh kiwei pat ki heh nongïalam kiba la pynpaw ka jingsngewsih bad ka jingduhnong kaba khraw halor kane ka jingkhlad jong u Pawar, ki kynthup ïa u President jong ka seng Samajwadi Party u Akhilesh Yadav, ka heh nongïalam ka seng Bahujan Samaj Party ka Mayawati, u Myntri Rangbah jong ka Karnataka u Siddaramaiah bad u Symbud Myntri Rangbah u D K Shivakumar, u Myntri Rangbah jong ka Andhra Pradesh u N Chandrababu Naidu bad u Myntri Rangbah jong ka Bihar u Nitish Kumar.
