Shillong, K’Lyngkot 28
Ka heprit Hannah Kandara Warjri kaba 11 snem ka rta kaba shong basah ha Malki Shillong kaba dei ka heprit kaba wan ha ka kyrdan ba ar ha ka jingïakop tem guitar ïa kaba la tip kum ka She Shreds Indian’s Female Lead Guitarist Contest. Kane ha heprit hadien ba ka la wan ha ka kyrdan kaba ar ka la pynpaw ïa ka jingsngewkmen namar ka khlem poi pyrkhat ban poi kat ha kane ka kyrdan hynrei ka don pat ïa ka jingkyrmen ban jop.
Ka la ïathuh ba kiba ïashim bynta ha kane ka jingïakop ki bun bha hynrei ki bun kiba shah kyntait noh. Shuh shuh ka la ïathuh ba ïa ka kyrdan ba nyngkong ha kane ka jingïakop ba ïoh dei napoh ka Jylla Nagaland bad napdeng ki Khasi dei tang ma ka marwei kaba ïashim bynta. Ka la ïathuh ruh ba ha kane ka jingïakop ka la ïoh ïa ki vote lane ka jingkyrshan na ki paidbah kumba 1 hajar 7 spah tam.
Ha kaba ïadei bad ka khusnam ka la ïathuh ba kan sa ïoh pdiang ïa ki tiar tem kum ka guitar, ki pedal bad shibun kiwei ki khusnam kaba yn sa ïoh ban pdiang.
Ka Heprit Hannah K Warjri ka la ai khublei ïa ki paralok parajor, ïa ki nongkyrshan, ïa ki paidbah kiba la ai ka jingkyrshan bad ïa ki nongai mynsiem ba kan poi shaduh kane ka kyrdan. Kane ka heprit ka la pynpaw ruh ba kan ïakhun beit lada ïoh ka lad ha kiwei kiwei ki jingïakop tem guitar khnang ban wanrah nam bad burom ïa ka ïing ka sem bad ïa ka Jylla baroh kawei.
Ka la ai mynsiem ïa kiwei ki para khynnah ba ki dei ban sngewthuh ïalade ha kaei kaba ki sngewtynnad bad ki dei ban pynlut por bad ban trei shitom.
