Chennai, K’lyngkot:
U Myntri Rangbah jong ka Tamil Nadu, u MK Stalin ha ka sngi Palei, u la kyrshan ïa ki kyndon jong ka University Grants Commission (UGC) halor ka jinglong marryngkat ha ki jaka pule, da kaba khot ïa ka kum ka sienjam kaba la pynslem hynrei kaba pdiang sngewbha ban pynkylla ïa ka rukom treikam kaba la shah ktah ha ka jingshah lehbeiñ bad ka jingbym shimkhia jong ki jaka pule.
U la kynthoh pyrshah ïa ka seng Bharatiya Janata Party (BJP), da kaba ong ba ka la don ka jingkiew ha ka jingpynïap ïalade jong ki samla pule ha ki jaka pule ba kham heh, khamtam hapdeng ki samla pule Scheduled Caste bad Scheduled Tribe, bad ka jingshah thombor ba man ka por ïa ki samla pule na South India, Kashmir, bad ki jaitbynriew rit paid naduh ba ka la wan ha ka bor synshar ha ka sorkar pdeng.
U la ong ba dei ban pynkhlaiñ bad pynkylla thymmai ïa ki kyndon ban weng ïa ki jingduna ha ka jingtei bad ban pyntreikam da ka jingkitkhlieh kaba shisha lada ka sorkar BJP ka shimkhia ban ïada na ka jingïap jong ki samla pule, ban pynkut noh ïa ka jingshah lehbeiñ, bad ban pynduna ïa ka jingduh skul hapdeng ki samla pule na ki jaitbynriew kiba dang sahdien.
U Stalin, uba ki jingkynthoh jong u, ki la wan ha khmat ka Supreme Court, kaba la pynsangeh ïa ki kyndon kiba ïadei bad ka jingbatai ïa ka jingïapher jaitbynriew, da kaba kdew ïa ki kam kum ka jingpynïap ïalade jong u samla pule PhD jong ka University of Hyderabad, u Rohith Vemula, ha u snem 2016 bad ong ba wat ki Vice Chancellor ruh ki ïakynduh ïa ki jingshah kynnoh.
U la buh jingkylli ba kumno ki Equity Committee ba la pynïaid da ki khlieh jong ki jaka pule ki lah ban treikam laitluid, khamtam haba ki nongkyrshan jong ka Rashtriya Swayamsevak Sangh, ka tynrai jong ka BJP, ki ïalam ïa kiba bun ki jaka pule ba kham heh.
