Shillong, K’Lyngkot 29
Ka Hynñiewtrep Inte-grated Territorial Organi -zation (HITO) Jowai Circle ha ka sngi Palei jong ka taïew ha ka por kumba 11.30 ki la ïoh ban bat ïa ki kynthei Muslim kiba wan na ka Jylla Assam.
Ka jingïoh bat ka HITO ïa kitei ki kynthei muslim ka dei lyngba ka jingpyntip kiba shong die mar ha ïew Iawmusiang, Jowai, ba don ki kynthei muslim ba tyrwa tiar ha Iawmusiang, tangba bun kim ïa nud ban kem bad bat ïa ki namar kitei ki kynthei muslim ki don bun ngut bad ruh ha kajuh ka por ba ki dei ki kynthei briew, kim nud ban bat ne kren ïa ki.
Kumta ka seng mar ïa ïoh jingtip ka la poi bran-bran sha katei ka jaka bad kem ïa kitei ki poiwir lyngba ka jingpyntip sha ka tnad treikam jong ka Infiltration Depatment, Jaiñtia Hills District.
Hadien ba la ïoh kem ïa kitei ki bar jylla, ka seng ka la lap ba ki dei kiba wan na Assam bad ha kajuh kapor ki tei ki kynthei kim shym don ïa ki kot ki sla kiba biang, kum ki Labour Licence ne Trading Licence lane kino-kino ki kot kiba pynthikna shwa ban rung sha ka Jylla.
Kum ka seng kaba peit ïa ka imlang sahlang kumjuh hi ban ïada ïa ka jaitbynriew, u President ka HITO, Jowai Circle, u Bah Deibormi Siangbood u la ong ba kane ka jingwan kine ki briew ba nabar ban wan kamai shapoh Jylla, ka buh jingma ïa ka jaitbynriew.
U la ong ruh ba kine ki briew, suki-suki kin sa long trai da kaba shukor ïa ki briew lane da kaba die remdor ïa ki tiar sha ki briew ki bym tip ba ki jait mar aiu ki die sha ki.
