Shillong, K’Lyngkot 29
U Myntri Rangbah ka Jylla u Conrad K Sangma ha ka sngi Palei jong ka taïew, u la ïakynduh ïa u Myntri Rangbahduh jong ka Ri, u Narendra Modi ha Nongbah Delhi.
U Conrad Sangma u la pynpaw ka jingai khublei ruh halor ka jingsbun jong u, ban pyllait por ban ïakynduh, na ka bynta ki paidbah ka Meghalaya.
“Nga ai ka jingsngewnguh naduh mynsiem ïa ki jingkitbok kitrwiang jong u Myntri Rangbahduh ka Ri ha ka sngi ïoh Jylla pura ka Meghalaya (Meghalaya Statehood Day)”, la ong u Conrad.
U la ai khublei ïa u Myntri Rangbahduh namar ka jingithuh ïa ki jingtei ba phylla bad ba im jong u mynbarim, kynthup ki Jingkieng Diengjri.
Ha ka jingïalang, u Myntri Rangbah u la batai bniah ïa u Myntri Rangbahduh halor ki jingïaid shaphrang ka roi ka par jong ka Jylla ha kine ki khyndiat snem ba la leit.
U la pynpaw ïa ka jingtreikam kaba khlaiñ jong ka Meghalaya ban kyntiew ïa ka ïoh ka kot, ka jingpyn janai ha ka koit ka khiah ki longkmie ba kha khun bad ka jingdon ki nongshong shnong kiba lah ban tei ïa ka Jylla, ka jingpynkhlaiñ ïa ki Processing Unit kiba heh bad pynïasoh sha ki ïew ban kyntiew arshah ïa ka kamai kajih ki nongrep, ka jingïaid shakhmat ki kam pynroi jong ka New Shillong City, ka jingpynroi ïa ka kam jngohkai lyngba ki riew shimet bad ka jingïashim bynta lang ki paidbah, ka jingpynkhreh ban pynlong ïa ka 39th National Games ha u 2027, bad ki jingpyrshang ba khlem sangeh ha kaba pynneh pynsah bad kyntiew ïa ki rukom tip tynrai bad ki pateng tynrai.
U Myntri Rangbah bad u Myntri Rangbahduh ki la ïakren ruh halor ki buit treikam kiba ïadei bad ka jingroi bad jingkiew jong ka Jylla ha ki snem ban wan.
Ki bynta ba kongsan jong ka jingïakren ki kynthup ïa ka jingpynneh ïa ka jingkiew jong ki Jylla NER kiba kham rit, ka jingbteng ka jingkyrshan ka Sorkar pdeng ha ka jingbei tyngka, ka jingpynkiew ïa ka EAP Ceiling na ka bynta ka Jylla, ka jingpynroi ïa ki jingtei, ka jingpynkupbor ha ka pla tyngka, bad ki jingpyntreikam ïa ki prokram ba bun snem kiba thmu ban pynkhlaiñ ïa ki nongrim ka Jylla ban kyntiew ïa ka ïoh ka kot.
U Myntri Rangbah u la aiti ruh ïa ka thup ki kot ki sla sha u Myntri Rangbahduh kiba batai ïa ka jingkiew shaphrang ka Jylla, ka thong jong ki snem ban wan bad ka mat ba kham kongsan ka dei ka jingpan ïa ka jingkyrshan ba khlem sangeh na ka Sorkar India.
Kine ki kynthup ïa ki jingthoh halor ka jingkiew shaphrang ka Jylla Meghalaya ha ka roi ka par, ka Vision 2032 bad ka jingtyrwa ban pynneh ïa ka lynti ïaid jong ka Jylla haba phai sha ka roi ka par kaba ïaid ryngkat-ryngkat bad ka thong jong ka Ri jong ka Viksit Bharat.
