Nongstoiñ, K’Lyngkot 29
Ka tamasa ‘Sngithiang’ kaba ar sngi lynter ïa kaba la pynlong da ka BANARIG Foundation West Khasi Hills ha ryngkat ka jingïatreilang bad ka Meghalaya Tourism ha madan New Nongstoiñ kala kut noh ha ka sngi Saitjaiñ jong ka taïew ba la lah da kaba jop bad shongkun kaba la long shisha kum ka bynta kaba kongsan ha ka kolshor, ki riti dustur, bad ki sap ki phong jong ki samla.
Nalor ka jingpynroi ïa ka kolshor, la pynpaw ba ka Sngithiang Festival ka la don bynta ruh ha ka ban kyntiew ïa ka kam jngohkai pyrthei ha West Khasi Hills da kaba pyni ïa ka pateng ba riewspah jong ka thaiñ, ki riti dustur, ka jingitynnad jong ka mariang bad ka sap shna jingshna sha ki paidbah.
Ha kine ki ar sngi jong ka tamasa, ki la don bun ki jingpynbyrngia ba kynthup naduh ka jingïakop shad, rwai, ka jingïakhun kti, ka jingïakop shna phlim lyngkot, ïakop shon dur bad kiwei-kiwei bad ha kane ka tamasa ym don kano-kano ka jingshim bai rung naduh kiba ïashim bynta, nangta ha kane tamasa la wan rwai ruh da ki kynhun rwai ba paw ka Jylla kiba kynthup ïa ka Thunders cave, Jessie Lyngdoh bad kiwei-kiwei ki jingïakop, ba kynthup ïa ka jingïakop ‘thei bhabriew ïa kaba la ai nam kum ka ‘Miss Sngithiang 2026’ ha kaba ka Evashisha Nongtnger kala ïoh ban rah ïa ka nam Miss Sngithiang 2026.
U Bah Methodius Dkhar, MLA ka Mawshynrut bad uba long ruh u Myntri Sorkar haba kren kum u kongsan u la ai khublei kyrpang ïa u Bah Gabriel Wahlang MLA ka Nongstoiñ ha kaba u la ong ba kane ka dei ka sien kaba nyngkong hapoh West Khasi Hills ba yn don ïa kum kane ka tamasa bad u la pynpaw ïa ka jingkyrmen ba nangne kan sa nang bteng ïa kiwei-kiwei ki kam ba kum ka Sorkar kan sa nangtrei na ka bynta ka Jylla bad West Khasi Hills hi baroh kawei.
U Bah Methodius u la ong ba don lehse kiba ong ba ka Sorkar lane u MLA um leh eiei bad don lehse kiba pyrkhat ba kane ka dei tang ka jingpynlut phut lane ka dei tang ka tamasa, hynrei kane kam dei tang ka tamasa ne leh sngewbha hynrei kane ka dei ka rynsan na ka bynta ki samla, ki nong West Khasi Hills ba kin pynpaw ïa ki sap ki phong kaba ki don.
U Bah Gabriel Wahlang haba kren ha ka sngi pynkut ïa ka tamasa u la ong, ka jingmut jong ka Sngithiang Festival ka long kata ka jingkyrmen ïa ki samla ban ai mynsiem ïa ki khun samla bad ba kin pyni ïa ki sap ki phong ki jong ki.
“Haba ngi peit ïa ki samla ki jong ngi katno ngi la kiew ha Nongstoiñ hynrei ngim don ka rynsan ban ai ïa ki samla ki jong ngi,” u la ong da kaba u la bynrap “Ngi la kyntiew ïa ka kam pule puthi da kaba ai ïa ki khusnam, la pyrshang ban ai ki coaching class na ka bynta kumno ban pass bha ïa ki eksam DSC bad ki eksam bapher-bapher hynrei mynta ka long ban plie ïa ka lad ka lynti sa ki sap ki bapher-bapher”.
Shuh shuh u Bah Gabriel u la ong ruh ba ïa kane ka tamasa yn pynlong man u snem ha kaba la shem snem kan kham heh bad kaei ka jingthmu ka long ba baroh kin ïa shim bynta.
U samla Rinaldi Kharbani, Chairman ka tamasa u la ong, ka tamasa Sngithiang ka long kum ka rynsan ban pynkup bor ïa ki samla, ban pynkhlaiñ ïa ka jinglong tynrai, bad ban pynshlur ïa ka jingpynpaw pyrthei, ha kajuh ka por ruh ban noh synñiang sha ka kam kamai kajih ha ka thaiñ lyngba ki kam jngohkai pyrthei, ka jingpdiang sngewbha, bad ki jingshakri kiba ïadei bad kane.
Shuh shuh u la ong ruh ba wat hapdeng ki jingeh ha ka liang ka jingpynbiang, hynrei la pynlong ïa kane ka tamasa da kaba ïaid beit ïaid ryntih da ka jingïatreilang jong ki nongtrei mon sngewbha, ki bor synshar shnong, bad ki paidbah.
U samla Rinaldi u la ai khublei ruh ïa baroh ki nongïashim bynta, ki nongtrei mon sngewbha, ki nongkyrshan, ki paidbah nongshong shnong na ka bynta ka jingkyrshan bad jingïashim bynta jong ki, ha kajuh ka por u la pynpaw ka jingsngewnguh kaba khraw ïa u Bah Gabriel Wahlang, MLA ka Nongstoiñ uba la ïai bteng ban ïalam bad ai jingkyrshan bad noh synñiang shibun eh na ka bynta ban pynlong ïa kane ka tamasa kaba jop.
Ha kane ka sngi pynkut ïa kane tamasa la ïadonlang ruh ka Hema Nayak, IAS, Deputy Commissioner ka West Khasi Hills District, u Bah H Kharkongor, Superintendent of Police ka West Khasi Hills, ki heh ophis ka district bad kiwei-kiwei kiba la sam ruh ïa ki khusnam bapher-bapher sha ki nongjop.
