Shillong, K’Lyngkot 29
Ka National People’s Party (NPP) ka seng kaba lamkhmat ïa ka bor synshar ha Meghalaya kam pat shim satia ïa kano-kano ka rai ha kaba ïadei bad u ne ka kyrtong na ka bynta ka ilekshon Rajya Sabha ka ban sa wan.
Ïa kane la pyntip da u Nongïalam ka NPP u Bah Sniawbhalang Dhar uba long ruh u Symbud Myntri Rangbah ka Jylla ha ka sngi Palei haba jubab halor ki khubor hamsaïa ba ka NPP ka lah ban sei bad pynïeng da u MLA barim ka Mawsynram u Bah Himalaya Shangpliang kum u kyrtong na ka bynta ka shuki ha ïingdorbar jong ka Rajya Sabha.
“Haduh mynta, ngim pat shim kano-kano ka rai halor kane namar ngin ap shwa bad ai ba ka samoi treikam jong u MP ba mynta ka Rajya Sabha kan kut shwa. Kum ka seng ngin sa shong bad shim lang ïa ka rai ïamonlang jong baroh,” la ong u Bah Sniawbhalang sha ki lad pathai khubor.
Haba kylli halor ka kyrteng jong u Myntri barim ka Sorkar u James K Sangma ban long kum u kyrtong hadien ba ka khubor ka la sawa, u Bah Sniawbhalang u la ong, “Nga la ong ïa phi ba ngim pat shim ïa kano-kano ka rai haduh mynta. Ka lah ban dei tang ka jingmutdur na ka liang jong ki paidbah. Kane kam dei satia ka mat.”
Lah ban kdew ba na ka liang jong u James Sangma u la pynpaw ba u kloi ban shimti lada na ka liang ka seng ka bynshet ïa kane ka kam ha u.
Ka shuki hapoh ka ïingdorbar Rajya Sabha la khmih lynti ba shen kan sa long thylli noh hadien ba u MP ba mynta u Dr. W.R. Kharlukhi u la pyni dak ba un nym ïakhun shuh.
