Shillong, K’Lyngkot 29
U MLA ka Bharatiya Janata Party na Pynthorumkhrah u Bah AL Hek u la ong ba ka Sorkar Jylla ka dei ban shimkhia ban tohkit bniah ïa ka jingmih ka poster ka ISIS-K kaba byrngem ïa ki paid Garo ba ki dei ban mih noh na ki jaka ba ki sah ha West Garo Hills ha shuwa jong u snem 2027, lada ki dang ieit la ka jong ka jingim.
U Bah Hek haba kren sha ki nongthoh khubor ha ka sngi Palei u la pynpaw ba ka jingmih ka jingthoh kaba byrngem ïa ki paid Garo, ym pat lah ban pynthikna la ka dei kaba shisha ne em, hynrei kaba donkam na ka liang ka Sorkar bad ka tnad Home, kam dei satia ban kheiñ sting bad ka dei ban wad bniah ïa ka jingshisha.
Shuh-shuh u Bah Hek u la kyntu ïa ka Sorkar ba kam dei ban ailad ïa kiba kum kine ki jingpyntieng pynsmiej ïa ki paidbah nongshong shnong jong ka Jylla bad ong ba kumno ki paid Garo kin mih sha bar jong ka Jylla Meghalaya naba ki dei ki trai shnong, trai jaka.
“La dei ban pynmih te ngin pynmih ïa kita ki ISIS jong ki, kum kita ki briew ym dei ban ai jaka sah jaka shong lane tang ka jaka ba kin wan ruh ha kane ka Jylla jong ngi bad ha ka Ri India, kum kita ki ISIS dei ban pynduh jait shi syndon lada ki don shisha,” la ong u Bah Hek.
Nalor kata u la ong, watla haduh katno ka dei kaba shisha ym pat lah ban pyntikna, hynrei kum ka Sorkar hi ka dei ban wad bniah haba ïadei bad kane ka jingjia.
U la bynrap ruh da kaba ong ba ha kiba kum kine ki jingjia ka donkam ïa ka jingïatreilang hapdeng ka Sorkar Jylla bad ka Sorkar Pdeng, bad ka Sorkar lyngba ka tnad Home ka la dei ban phah jingtip mardor sha ka Sorkar Pdeng bad bynrap ba kum kine kiei-kiei kiba wan jia ban pyntieng ïa ki nongshong shnong ka dei kaba ym lah ban pdiang.
Na ka liang u Bah Hek u la pynpaw ka jingpynrem jur ïa kane ka jingjia, lada kane ka jingbyrngem ka dei kaba shisha.
Lah ban kdew ba ha ka sngi Balang ka la mih ka poster ba la soi ha ka kyrteng ka ISIS-K kaba byrngem ïa ki paid Garo ba shong ba sah ha West Garo Hills bad ha ki jaka ri thor ba ki dei ban mih noh na ka jaka sah jong ki ha shwa u snem 2027 lada ki ïeid ïa la ka jingim da kaba kam ba ka dei ka jaka jong ki.
Kane ka jingmih kane ka jingbyrngem ka la pynkyndit bad pynsheptieng ïa ki paidbah Garo kiba shong ba sah ha katei ka thaiñ khamtam ha Tura.
