Raipur, K’lyngkot:
Ka la don ka jingïasiat kaba markylliang hapdeng ki bor pahara bad ki lehnoh Naxal ha ka District Bijapur jong ka Chhattisgarh ha ka sngi Palei, ong u heh pulit.
Ka jingïakhun markhmat ka la sdang naduh mynstep ha kawei ka khlaw kaba don ha ka bynta ba shaphang Shathie jong ka Bijapur ha kaba ka kynhun jong ki shipai District Reserve Guard (DRG) ka la mih ban leit ïakhun pyrshah ïa ki lehnoh naba kumba la ïoh ïa ka jingtip kaba bniah, la tip ba ki la don ki dkhot jong ka kynhun ha ryngkat ki tiar ïaleh ki la don ha katei ka thaiñ, u la ong.
Kham hadien katto katne por ba la bteng ka jingïasiat ki shipai ki la lap ïa ki metïap jong ki arngut ki lehnoh Maoist ïa kaba la ïoh tam ha ka jaka ba la don ka jingïasiat.
Ki bor pahara ki la ïoh kurup ruh ïa kawei ka suloi AK-47, kawei ka pistol 9 mm, ryngkat bad kiwei kiwei ki tiar ïaleh bad ki kuli na katei ka jaka.
Kane ka jingïasiat ka la jia hadien ba la pynlong ïa ka jingkhynra katkum ki jingtip ba kyrpang shaphang ka jingdon jong ki Maoist kiba don tiar ïaleh ha katei ka thaiñ.
Ki kynhun jong ki shipai District Reserve Guard (DRG) ki dang pynlong ïa kane ka jingkhynra ha ka thaiñ South Bastar ha kaba ki la shah siat da ki kuli ha ki lehnoh.
Ki heh sorkar ki la ong ba ka jingïasiat ka kynhun DRG bad ki Maoist ka la sdang ha ka por 7 baje mynstep bad ka la bteng hateng hateng.
Namar ba ka jingkhynra ka dang ïaid shakhmat, ki heh sorkar ki la ong ba ïa ki jingtip ba bniah kum ka jaka ba thikna jong ka jingïasiat, ka jingdon ki bor pahara kiba don bynta ha ka jingpyntreikam bad kiwei kiwei ki jingtip kiba kongsan ym lah ban ïasam ha kane ka por ban pynthikna ïa ka jingshngaiñ jong ki shipai kiba don ha madan.
