Nongpoh, K’Lyngkot 29
Ki pulit ka thanad Umsohlait ha ka jingkhynra kaba la pynlong ha ka step phyrngap jong ka sngi Palei ha ki bynta jong ka khlaw Kseh Kynjoi, Ri Bhoi District, ki la ïoh ban kem noh ïa uwei na ki runar uba la don case ha thanad Mawngap hapoh ki kyndon 323, 325 bad 376 jong ka Indian Penal Code (IPC).
Katkum ka khubor na ki pulit, la ïathuh ba utei u runar u dei uba la tip kyrteng kum u Teibor Mawlong bad ha katei ka jingkhynra bad kthong jong ki pulit, utei u runar u la pyrshang ban phet krad da kaba shim kabu ïa ka jinglong khlaw katei ka jaka.
La ïathuh ruh hadien ka jingïohkem, ki pulit ki la ïoh ban kurup ïa kawei ka pistol revolver bad kawei ka mobile phone na ka met jong utei u runar bad la ïalam noh ïa u ïingbishar na ka bynta ban leh ïa kaba donkam katkum ki kyndon aiñ.
