Switzerland, K’lyngkot:
U Jacques Moretti, uba dei u trai jong ka Le Constellation, kaba dei ka jaka dih lane ka ‘bar’ kaba don ha Crans-Montana jong ka Switzerland, u la kynnoh ia katei ka nongtrei ‘waitress’, ba dei na ka daw jongka, kaba la wanrah ia ka jingpluh ding kaba shyrkhei ha ka 1 tarik u Kyllalyngkot kaba la shim ia ka jingim jong ki 40ngut ki nongleit leh kmen sha katei ka jaka. U Jacques, ryngkat bad ka kurim jong u, ka Jessica Moretti, ki la leit mih hakhmat ka iing kashari ha ka taiew ba la dep bad ki la ïathuh ha ki nongmudui ba ki dei kiwei kiba donkti ban sdang ïa katei ka kam thurmur, ym ma ki.
“Ngam shym la pyni ha ka, ia kino- kino ki lad jingiada ne ki jingpyrkhing kum ka nongpeit ia ka bam- ka dih ha katei ka jaka. Ngam shym la pynsngewthuh ia ka ia kino kino ki jingbthah ne ki lad jing ïada namar ngim shym la iohi ba kan don kano- kano ka jingma. Ka Cyane ka ju sngewtynnad ïalade ban leh kmen leh sngewbha bad kumta ka ju sngewtynnad ban ia leh kmen artad ruh ïalade ha katei ka jaka,” la ong u Jacques, katkum ka jingphla jong u hakhmat ka kynhun tohkit.
Katkum ki dur ba la ioh ring dur ha katei ka sngi, la iohi ia katei ka nongshakri, ka Cyane Panine, 24 snem ka rta, ba ka bat ia 2 tylli ki bilor champagne kiba meh ding, kaba kitei ki arngut shi kurim, ki la kynnoh ba ka dei katei ka daw kaba la wanrah ia katei ka jingpluh ding kaba shyrkhei ha katei ka jingjia.
“Lada nga la pyrkhat ia ka jingma kaba rit eh, ngan jin da la khang ia ka. Ha ki 10 snem ba nga la pyniaid ia ka kam, ngam shym la pyrkhat ba ka lah ban don kano kano ka jingma,” la ong ka Jessica.
Namar la suba da dei kitei ki thylliej ding kiba rit, kiba la thang bad pynmeh na trai jong ki bilor champagne, kiba la pynkem ding hajan ka jingkhang kaba rit jong katei ka jaka leh kmen, kaba la sop da ki kynja foam, katkum ba la sakhi ha ki dur, kiba la saphriang paidbah ha ki rynsan social media.
Kawei ka video ka pyni ia ka bynta ba nalar jong ka sad halor jong ka jingkhang bad ki thylliej ding kiba la pur stet bha, ha kaba ki nongshad ha kaba sdang ki dang iai bteng ban shad, kumba kim salia ia ka jingma jong ka jingkem ding jong katei ka jaka.
