Shillong, K’Lyngkot 29
U Myntri Rangbah ka Jylla u Conrad K Sangma ha ka sngi Palei u la pynpaw ka jingsngewnguh ïa u Myntri Rangbahduh ka ri u Narendra Modi bad Myntri ka Sorkar Pdeng uba khmih ïa ka tnad Kolshor u Gajendra Singh Shekhawat halor ka jingjied ïa ka Jingkieng Jri ka Jylla ban phah ïa ka jingtyrwa sha ka UNESCO ban ithuh kum ka World Heritage Site.
“Paralok kumba phi tip, ka Jingkieng Jri ne ka Living Root Bridge kala rung ha ka thup kyrteng kaba la phah da ka Sorkar India ban shah pynrung noh ha ka UNESCO World Heritage Site. Nga shim ïa kane ka kabu ban ai khublei ïa u Myntri Rangbahduh ka ri bad ïa u Myntri ka tnad Kolshor kiba la pdiang ban phah ïa katei ka jingtyrwa,” pynpaw u Conrad Sangma ha ka kyrwoh khubor lyngba ka durkhih.
Kane ka jingtyrwa ïa ka “Jingkieng Jri / Lyu Chrai Cultural Landscape, Meghalaya,” ka dei kaba la dep ban aiti ha Paris da u Nongrahtien Syiem ne Ambassador ka ri India bad u Permanent Representative sha ka UNESCO u Vishal V. Sharma ha kaba u la aiti ha u Lazare Assomo Eloundou uba long u Director ka UNESCO’s World Heritage Centre.
U Conrad u la pynpaw ba ka long u mawmer ha ka histori jong ka Meghalaya, ha kaba phah ïa ka jingthoh sha u Myntri Rangbahduh ka ri u Narendra Modi da kaba ong, “Ka jingphah ïa ka jingtyrwa ba ïa ka Jingkieng Jri / Lyu Chrai Cultural Landscape (Living Root Bridge Cultural Landscape) ban pynrung ha ka thup jong ka UNESCO kum ka World Heritage List ka dei ka khyllipmat kaba khraw ïa ka Jylla bad ïa ki paidbah”.
U la ong, ba kane ka jingtyrwa ka pyni ïa ki 8 snem jong ka jingïatreilang kaba kynthup ïa ki 63 tylli ki shnong, 42 tylli ki Cooperative bad 120 tylli tam ki Jingkieng Jri, kaba pyninam ïa ka jingïatylli, ka jingshimkhia da ki shnong ki thaw ha ka ban pynneh pynsah ïa ki jingdon kiba naduh hyndai hynthai.
U Conrad u la ban jur ba katei ka jaka ka mihkhmat ïa ka rukom thaiñ lang ïa ki khlaw ki btap, ki wah, ki lynti ïaid, ka riti dustur bad ki jingleh kiba ïada ïa ki jingim ha ki sawdong sawkun, kaba pyni ïa ka jingïadei kaba kham phylla hapdeng ki paidbah bad ka mariang ha rilum Khasi bad Jaiñtia.
Shuh shuh u Conrad u la ong, “Da ka jingngam tynrai ha ki jinglong kordor jong ka jingïatreilang, jingieid, jingburom, jingshaniah bad ka jingtrei shitom, kane ka jaka kaba itynnad ka tyrwa ïa ka nuksa kaba khlaiñ bha ban ïakhun ne kyrda ïa ka jinglong ka suiñbneng, ha kaba ki briew bad ki jingim jong ka mei mariang ki imlang da ka jingsuk jingsain.”
