Shillong, K’Lyngkot 29
U Myntri Rangbah ka Jylla Conrad K Sangma u la kyrpad ïa u Myntri Rangbahduh ka Ri u Narendra Modi ba un tuklar lem na ka bynta ban bteng bad pynkhlaiñ ïa ka Special Assistance to State for Capital Investment (SASCI), da ka jingbuh ïa ka mang tyngka ba duna eh T.2 lak klur ha u snem ban wan, ban pynneh ïa ka jingïaid ki kam pynroi kaba la leh da ki Jylla.
Ha ka jingïakren bad u Modi ha ka jingïakynduh ïa u ha Delhi, u Conrad u la buh ruh ka jingkyrpad ban ai ïa ka mang tyngka ba kyrpang na ka SASCI sha ki Jylla barit jong ka thaiñ Shatei Lam-Mihngi (lait noh ka Assam).
“Ki Jylla ba rit ka thaiñ NE ki ïoh 100% na ka mang ha ka Part I jong ka SASCI na kaei kaba ju ai sha ki. Ka Jylla ka kyrpad ba dei ban ai noh 200-300% ïa ki Jylla ba rit ka thaiñ na ka bynta ki khyndiat snem ban wan,” u la ong.
Ka SASCI ka la kylla long ka nongpynïaid ba kongsan na ka bynta ka jingpynlut pisa ha ka kyrdan jong ki Jylla, da kaba pyndonkam ïa ki jingmang pisa kiba ïadei bad ki kyndon bad kiba ïadei bad ka jingtreikam ban wanrah ïa ki jingpynkylla, ban pyntreikam ha ka por kaba biang, bad ban pynbha ïa ka jingpyndonkam ïa ka pisa, kaba pynlah ïa ki Jylla, khamtam ha ka thaiñ ban tei ïa ki jingtei kiba bha, ban thaw ïa ki lad aikam, bad ban pynneh ïa ka jingroi ka ïoh ka kot.
“Ka Meghalaya ka la pyndonkam bha ïa ka SASCI, ha kaba ka jingmang pisa ka la kiew na ka T.200 klur ha u snem mang tyngka jong u snem 2021 sha ka T.2,370 klur ha u snem mang tyngka 2025. Ka pisa ka la kyrshan ïa ki jingbei tyngka ba kongsan ha ka jingshna ïa ki surok ha kylleng ka Jylla, ka jingpynbiang um, ka bording, ka jingpynroi sor, ka kam jngohkai pyrthei, ki digital library, bad ki jingpynbha kiba lah ban ïohi ha ka liang ki lad pynïasoh bad ka jingai jingshakri,” ong u Conrad.
