Shillong, K’Lyngkot 29
Ka Sorkar Jylla ka la mang T.40 klur na ka bynta ban shna pynbha bad siang rong ïa ki surok ba kongsan ha nongbah Shillong bad kane ka long kum ka jingpynkhreh ka Jylla ïa ka jingwan ka 39th National Games.
Haba kren sha ki lad pathai khubor ha ka sngi Palei, u Symbud Myntri Rangbah u Bah Sniawbhalang Dhar u la ong, “Kane ka dei shi bynta jong ka jingpynkhreh na ka bynta ka National Games.”
U Bah Sniawbhalang u la pynpaw ba kane ka projek ka kynthup ïa ka jingpynbha ïa kumba 40-46 kilometre ki Surok ba la sniew ha kylleng ka nongbah Shillong ha ka jinglut kaba la shu antad kumba T. 40 klur tam.
Nalor kata u la pyntip ruh ba ka jingpynbha ïa ki surok ha ki thaiñ Laitumkhrah ka la dep artad bad la khmih lynti ba kane ka kajuh ka rukom trei pynbha ïa ki surok kan long ha kiwei ruh ki bynta jong ka nongbah Shillong ha shuwa ban kut u snem 2026.
“Ngin sa ai rong ïa baroh ki kynroh bad ki jingker (kum ka jingpynkhreh ïa ka National Games)” ong u Bah Sniawbha haba bynrap ba kine ki jingpyrshang ban pynitynnad ki dei shibynta na ki jingthmu ka Sorkar ban pynbha ïa ki jingtei kiba don hapoh Sor Shillong.
Ka projek ban pynbha ïa ki surok ka dei ka jingpynkylla ïa ka projek ‘Smart Road’ kaba kham mynshuwa bad kaba la shah weng noh namar ka jingbym lah ban pyntreikam.
