Khliehriat, K’Lyngkot 29
Ki Pulit ka Jylla ha ka 29 tarik Kyllalyngkot ki la leit ban thang noh ïa ki drok kiba shongdor haduh T.9.11 klur ïa kiba la ïoh ban kurup na ki 7 tylli ki District ka Rilum Khasi Jaiñtia hapoh ka jaka thang jong ka karkhana Star Cement ha Lumshnong, East Jaiñtia Hills District.
Ha kane ka jingleit thang ïa ki drok la lamkhmat da ka kynhun ki heh pulit ka Jylla hapoh ka jingïalam jong u Inspector General of Police (CID), Meghalaya, u Aditya Goenka, IPS ha ka jingïadon lang ki Superintendent of Police ka East Jaiñtia Hills, East Khasi Hills, West Khasi Hills, South West Khasi Hills.
Haba kren sha ki lad pathai khubor hadien ba la dep ban thang ïa kine ki drok, u IGP-(CID) u Aditya Goenka u pyntip ba kine ki drok kiba la pynduh noh ki kynthup ïa 183 gram u heroin ba shongdor T.34,83,678, 296 kilo u ganja ba shongdor T.6,97,68,000, 9 kilo u yaba tablet ba shongdor T.1,48,39,500, 2793 tylli ki dawai jyrhoh Phensedyl ba shongdor T.27,93,000 bad u dawai kuli R-7 haduh 534 tylli kiba shongdor T.2,13,600.
U la ong ruh ba ka dor jong baroh kine ki drok ba la thang noh ha kane ka jaka ki la kot haduh kumba T.9.11 klur, da kaba bynrap ba na ka liang ki pulit bad ka Sorkar Jylla ki ïeng skhem ha ka nongrim ban pynlong ïa ka Meghalaya ka Jylla kaba lait na u drok bad ba ki jingkhynra pyrshah ïa ki kam khaïi drok ki dang ïai bteng ha kylleng ka Jylla bad ba kine ki drok ba la thang ki dei kiba la ïoh kurup na ki 58 tylli ki case NDPS.
