Nongstoiñ, K’Lyngkot 29
Watla la ïaid san sngi ba ki katto katne ki briew ki la lap ïa ka met khyllung ba la suba ba la shu wan bret ha kawei na ki jaka ha ka wah Nonbah, hynrei haduh mynta ym pat shym lap ksai ïa ki briew kiba donkti ha kane ka kam.
U Superintendent of Police ka West Khasi Hills u Bah H Kharkongor haba kren bad u nongthoh khubor u la ïathuh ba haduh mynta ym pat shym la lap ksai satia hynrei ki pulit ki dang bteng ban buddien halor katei ka jingjia.
Lah ban kdew hangne, ha ka step jong ka 24 tarik mynta u bnai, ki katto katne ki briew ki la lap ïa kawei ka met i khyllung ba la suba ba la shu wan bret ha kawei na ki jaka ha ka wah Nonbah.
Kum ban shu pynkynmaw, u Secretary ka Shnong Upper New Nongstoiñ u Bah H Kharlyngdoh ha ka jingdonlang u Bah SS Nongsiej, Rangbah Dong bad u President ka VDP jong ka Shnong S Syiemiong ki la ïathuh ba na ka liang jong ki, kum ki nongïalam Shnong ha ki por kumba 9 baje mynstep ki la ïoh ïa ka jingpyntip na ki nongshong shnong kiba sah hajan katei ka jaka ba ka don ka met jong i khyllung bad hadien ba la wan peit la lap ïa ka met hynrei ym shym la tip mano ba wan bret ha kane ka jaka.
Nangta, ki la ïathuh ruh ba hadien kane na ka liang ka Shnong kala pyntip noh sha ki pulit ha kaba ki pulit ruh mar mar kila wan ha kane ka jaka ban leh ïa kaba donkam.
Shuh shuh katkum ka jingpeit ka jong ki, la ïathuh ba itei i khyllung i dei i ba dang don ha ki saw bad san bnai bad i dei ruh i shynrang.
