Shillong, K’Lyngkot 30
Ka Meghalaya Human Rights Commission (MHRC) ka la ai jingmut ban siew bai lutksan sha ki 15 ngut ki ‘riew shimet kiba long ki lanot kiba ngat ha ka jingshah pynkheiñ ki hok longbriew-manbriew ha ka por ba ki pulit ki la pynlong ïa ka jingkhynra ha Rimpu Bagan, West Garo Hills District, ha ka 22 tarik Naitung, 2022.
Man la uwei-pa-uwei u nongujor la buh ba un ïoh T.50 hajar kum ka bai lutksan.
Ka MHRC ka la pynngat haduh 30 tylli ki mukotduma kiba ïadei bad ki jingujor halor ka jingpynkheiñ ïa ki hok longbriew-manbriew, hynrei ki nongujor ki la weng noh ïa 15 tylli na kine.
Ka Commission ka la pynlong ruh ïa ka jingtohkit haba ïadei bad ki mukotduma kiba dang sah bad lap ïa ki sabut jong ka jingpynkheiñ ïa ki hok longbriew-manbriew, kaba la ïalam pat sha ka jingai jingmut ban siew ïa ka bai lutksan.
“Ïa ka jingtohkit la leh da ka Commission na ka bynta ki 15 tylli ki mukotduma kiba dang sah bad hadien ba la sngap ïa ki sakhi-sabut na baroh arliang mamla, ka Commission ka la mynjur ïa ka ‘Final Order’ ha ka 29 tarik Kyllalyngkot, 2026 kaba la thoh sha u Principal Secretary ka Sorkar Meghalaya ka tnad kam pohïing ha ryngkat ka jingai jingmut ban siew ïa ka bai lutksan kaba T.50,000 (marwei) sha uwei-pa-uwei u nongmudui namar ka jingpynkheiñ ïa ki hok longbriew-manbriew. Kane ka jingai jingmut ka long katkum ka Section 18 (e) jong of the Protection of Human Rights Act 1993,” ong u Secretary ka MHRC ha ka kyrwoh ba la pynmih ha ka Sngi Thohdieng.
