Srinagar, K’lyngkot:
Ki bor pahara ki la sdang ïa ka jingkhynra pyrshah ïa ki lehnoh halor ka jingthmu ban pynduhjait ïa ki lehnoh Jaish ha Kishtwar jong ka Jammu & Kashmir ha ka sngi Palei, hadien kane, la pynsangeh noh ïa ki jingpyntreikam ïa ka Internet ha kane ka thaiñ.
Ka jingïasiat kaba markylliang ka dang ïaibteng ha ka thain Chatroo jong ka Kishtwar.Ym pat don kano ka jingïasiat bad ki lehnoh haduh mynta.
Ka jingthwet ka dang ïaid shakhmat ha ki thaiñ Singpura jong ka thaiñ Chatroo, ha Arigam Dwathar bad ha Naidgam. Kane ka jingkhynra bathymmai pyrshah ïa ki lehnoh kiba don jingïadei bad ka Jaish-e-Mohammad (JeM) ka wan tang shi taïew hadien ba uwei u lehnoh na Pakistan, uba don ruh ka jingïadei bad ki Jaish, u la shah pynïap ha ka jingïasiat bad ki bor pahara ha Kathua distrik kaba don ha Jammu & Kashmir ha ka sngi Thohdieng, la ïathuh ki pulit.
Ki bor pahara ki la pynlong ïa ka jingkhynra lang ban pynduh jait ïa ki lehnoh bad ka la mih ka jingïasiat ha ka thain Billawar, ha kaba utei u lehnoh u la shah pynïap, ong u Bhim Sen Tuti, u Inspector General of Police ha ka thaiñ Jammu.
Une u lehnoh u dei uba la tip kyrteng kum u Usman uba na Pakistan, la ïathuh ka heh pulit jong ka Kathua ka Mohita Sharma.
“Ki bor pahara ki la ïoh ban kurup ïa ka M4 carbine ba la shna ha US bad katto katne ki tiar siat bad ki kuli na u”, la bynrap shuh shuh ka Sharma, kumba la ïathuh hashwa da ka lad phah khubor.
