Shillong, K’Lyngkot 30
U Myntri ka Sorkar Jylla u ba dei khmih ïa ka tnat ka koit ka khiah u Bah Wailadmiki Shylla u la pyntip ba ka Sorkar Jylla ka dang ap ïa ka kaiphod na ki ‘consultant’ ban tip ïa ka lynti kaba biang eh ha ka ban pynïaid ïa ka 108 Emergency Services ha Jylla.
“Ngi dang ïa ap mynta namar ngi la thung ïa ki ‘consultant’ ba kin wad bniah ïa kaei ka lynti kaba biang eh kaba ngin lah ban pynïaid bha ïa ka 108 Emergency Services. Ngi dang ap ïa ka kaiphod,” ong u Bah Wailad haba ïakren bad ki nongthoh khubor ha ka sngi Thohdieng.
Haba kylli halor ka tulop ba sahteng jong ki nongtrei, u Bah Wailad u la jubab, ba u khlem ïoh jingtip eiei halor kane da kaba pynpaw ba u khlem ïoh pdiang ïa kano-kano ka file bad pynpaw ba ka Sorkar kan sa peit bniah kumno ban leh ha kaba ïadei bad kane.
Lah ban kdew hangne ba ki nongtrei ka Meghalaya EMRI Worker Union ki la dawa ba ka Sorkar kan shimti hi noh ïa ka jingpynïaid bad ban siew ïa ka tulop ki nongtrei ha ka rukom kaba biang, da kaba ki la pynpaw ba ki la shah khñiot ha ka kompeni ba pynïaid, kumjuh ba kim don ka jingshngaiñ ha ka kam ba ki trei nalor ba ki hap ban trei ha ka rukom ka bym ïahap.
