Shillong, K’lyngkot 30
Ka long shisha kaba pynkyndit ïa baroh namar u Bah Jason Mawlong uba dei u MLA barim uba la ïakhun ïa ka tiket naka seng NPP ha ka ilekshon ba la dep u khlem shym la donlang ha ka jingïalang ka National People’s Party General Body Meeting kaba la long ha ka 28 tarik mynta u bnai Kyllalyngkot 2026 ha Umsning, Ri-Bhoi District.
Nalor u bah Jason, ym shym la ïohi ruh ïa ka Kong Macdalyne Mawlong kaba dei ka MDC barim ka Umsning Constituency bad ki nongkitkam ruh kumjuh.
Ha kane ka jingïalang la wan mih khmat na ka NPP Meghalaya unit da u Bah Hamlet Dohling uba dei u Working President, Bah HM Shangpliang uba dei u nongaiktien, u Bah Charles Marngar MLA Mawhati Constituency, u Dr. C Lyngdoh uba dei u MLA ka thaiñ.
Ha kane ka ka jingïalang la don tang ki nongkyrshan jong u Dr. C Lyngdoh.
Ki khubor kiba la ïoh lum la ïathuh ba ha kane ka jingïalang la pynlong ban pynrung ïa ki nongkyrshan Congress sha ka NPP hynrei la pynthymmai syndon ïa ki nongkitkam ka NPP Umsning block ha kaba baroh ki nongkitkam kiba rim kiba dei ki nongkyrshan u Bah Jason ki la shah weng lut.
Ki khubor ki ïathuh ba ka jingbym poi ki nongkyrshan u Bah Jason sha kane ka jingïalang ka dei namar u Dr. C Lyngdoh u khlem pyntip shuh, dei na kane ka daw ki khlem lah ban poi.
Haba pyrshang ban ïakren bad u Bah Jason u khlem treh ban kren eiei namar u dang bunkam.
Haba pyrshang ban ïakren bad ki katto katne ki nongkitkam u Bah Jason ki la ïathuh ba ki khlem poi ha jingïalang nanar ki khlem shah khot.
Ki pynpaw ka jinglyngngoh ba ha katei ka jingïalang la pynthymmai ïa ki nongkitkam hynrei la jied tang ïa ki nongkyrshan u Dr. C. Lyngdoh uba dei u MLA ba mynta katba ki nongkyrshan u Bah Jason uba dei u MLA barim la shah weng lut.
