Khliehriat, K’Lyngkot 30
Ki pulit na ka Anti-Narcotics Task Force (ANTF) ka East Jaiñtia Hills ki la ïoh ban kurup ïa u drok ‘heroin’ uba shongdor haduh T.20 lak na kawei ka ‘tanker’ kit umphniang kaba don ïa u Nombor AS-11-DC-1200, bad kem noh ïa saw ngut ki briew kiba donkti.
U Superintendent of Police ka District, u Vikash Kumar ha u kyrwoh u la ong, “Hadien ba la ïoh ïa ka jingtip kaba tikna, ka ANTF ryngkat ki pulit ki la pynlong ka jingtalasi hapoh Umkiang Police Patrol Post hadien ba ki la ïoh ban bat noh ïa kane ka ‘tanker’ bad kem noh ïa 4 ngut ki briew.”
“Kine ki 4 ngut kiba la shah kem ki dei kiba la tip kyrteng kum u Shymal Boro, Matab Uddin, Ataur Rohman, bad u Biren Singha, baroh kiba dei na Assam bad ïa kiba la suba jur ba ki dei ka bynta jong ka kynhun runar kaba kham heh kaba donkti ha ki kam khaïi drok bad kiwei pat ki Jylla,” u la bynrap.
Une u drok ‘heroin’ ba la ïoh kurup na ki saw tylli ki synduk sabon u don ïa ka jingkhia kaba 45.5 gram. Ki pulit ki la kurup noh ruh ïa 4 tylli ki ‘mobile phone’ jong ki.
Hadien kane ki pulit ki la pynngat mukotduma hapoh Lumshnong Police Station hapoh ka kyndon NDPS Act, bad ka jingtohkit ka dang ïaid shakhmat ban lap ksai shuh-shuh ïa kiba donkti ha kane ka kam be-aiñ.
