Shillong, K’Lyngkot 30
Kum ka dak ka jingai burom ïa ki riewshlur ka ri kiba la aiti ïa la ka jong ka jingim na ka bynta ban pynïoh jinglaitluid ïa ka ri India kumjuh ban kynmaw burom ïa ka lyngkhuh sngi ïap u Mahatma Gandhi, ka Jylla ka la ïashimbynta lang ha ka jingrakhe Martyrs’ Day ba 78 ka ri India.
Ha kane ka jingrakhe ha ka Jylla, ki heh Ophisar Sorkar ba la ïalam da u Principal Secretary u Bah F.R Kharkongor ki la leit buh syntiew ha u mot jong u Mahatma Gandhi uba don ha phyllaw ka Secretariat.
Ha ka por 10: 59 mynstep la pynsawa ïa ka siren hadien kata baroh ki kam ba kynthup ki pulit pynïaid kali bad ki nongleit nongwan la pynsangeh shipor namar ba ka jingpynlong ïa ka jingsngap jar kaba ar minit. Ka jingpynsawa ha ka sien kaba ar ha ka por 11:02 mynstep ka pynkut noh ïa ka jingsngap jar kaba ar minit.
Ïa Martyrs’ Day la ju rakhe man la u snem ha kylleng ka ri ban burom ïa ki jingaiti ba khraw tam jong ki nongïaleh laitluid bad ban kynmaw ïa ka pateng kaba neh jong ki.
