Nongpoh, K’Lyngkot 30
Ha kawei ka jingjia kaba la pynpar niangkhriat bad ka bym don shuh ka jingïatip lem, lai ngut ki hymmen shynrang ba kynthup ïa uwei uba dang rit ka rta, la kynnoh ba ki la leh be-i-jot ïa la ki para kynthei kiba dang rit ka rta ha kawei ka shnong kaba don ha Ri-Bhoi District.
Kumba la ïoh jingtip, kane ka kam sang kaba la leh da kitei ki hymmen shynrang pyrshah ïa 3 ngut ki para kynthei, ka dei kaba ki la leh la kham slem bad paw pyrthei tad haduh kine ki khyndiat sngi ba lah dep; kata hadien ba ki nongïalam shnong ki la ujor syndon da ka ejahar ha thanad pyrshah ïa kitei ki runar ki bym don shuh ka raiñ ka rem bad ka jingïatip lem.
Katkum ka ejahar ba la ujor da ka shnong, la ong ba kitei ki 3 ngut ki hymmen shynrang ki dei kiba don ha ka rta kaba 23 snem, 19 snem bad 16 snem, katba kitei ki para kynthei pat ki dei kiba dang ha ka rta kaba 13 snem, 10 snem bad 9 snem.
Ha ka ejahar, ka shnong ka kynnoh ruh ba ka kmie jong kitei ki heprit ka la tip ïa katei ka jingjia, hynrei ka la shu sngap man-man bad ïaleh ban buhrieh ïa katei ka kam bymman jong kitei ki khun shynrang.
Halor kane ka jingjia, na ka liang ka shnong ka la buh ruh ïa ka jingkyntu sha ki bor pulit ba kin pynngat mukotduma mardor ïa kitei ki runar bad ban pynlong ïa ka jingtohkit kaba bniah bad na ka liang ka shnong kan ai ïa ka jingïatreilang kaba pura bad ki bor pulit.
Shuh shuh, la ïoh jingtip ruh ba tang mar ïa ïoh ïa ka ejahar, ki pulit ki la pynlong ïa ka jingthwet bad la ïoh ban kem noh ïa kitei ki 3 ngut ki hymmen shynrang ba kynthup ïa uwei uba dang 16 snem ka rta bad ka jingtohkit ban lap ïa ki jingshisha halor katei ka jingjia ka dang ïaid shakhmat.
