New Delhi, K’lyngkot:
U Myntri Rangbahduh ka Ri, u Narendra Modi, ha ka sngi Palei, u la kyntu ïa ki dkhot ka Parliament, ba kin ïatreilang, na ka bynta ka roi ka par jong ka ri, shisngi hadien ba ka President Droupadi Murmu, ka la kyrpad ïa ka jingïatylli halor ki mat jong ka ri. Haba kren sha ki lad pathai khubor ha Parliament Complex hashwa ka dorbar mang tyngka, u Modi u la ong ba ka synshar paidbah bad ka jingbun briew jong ka India ka long “ka sharak jong ka jingkyrmen na ka bynta ka pyrthei”.
Haba batai ïa ka rukom treikam jong ka sorkar ban pynlong ïa ka ri India kum ka ri kaba la roi bad kaba lah ban shaniah ha u snem 2047, u la ong, “Ka sorkar jong ngi ka ngeit ha ka jingpynkylla, ka jingtreikam bad ka jingpynkylla. Haba ïadei bad ka jingkren jong ka President ha ka jingïalang jong baroh ar tylli ki ïingdorbar ha ka sngi Palei, u Modi u la ong ba ka pynpaw ïa ka jingshaniah ha lade jong ki 140 klur ngut ki nong India bad ka pynpaw shai ïa ki jingangnud jong ki paidbah, khamtam ki samla.
“Ka jingkren jong ka President ka la buh ïa ki jingpyrkhat ba ïalam ïa baroh ki MP ba donburom,” u la ong bad bynrap ba ka Dorbar Mang Tyngka ka long kaba kongsan bha.
U Myntri Rangbahduh u la ong ba ka ri ka la rung ha ka bynta kaba rai kaba 25 snem ban pynurlong ïa ka thong jong ka India kaba la kiew ha u snem 2047. “Kane ka dei ka Mang Tyngka kaba nyngkong eh jong ka shiphew snem kaba ar jong kane ka spah snem”, u la ong.
U la kdew ba ka Myntri pla tyngka ka Nirmala Sitharaman kan wanrah ïa ka Mang Tyngka ha ka sien kaba khyndai lynter, ha kaba kan long ka Myntri pla pisa kynthei kaba nyngkong eh ban leh ïa kane. U Modi u la batai ïa ka kum ka khyllipmat jong ka jingsarong ha ka histori jong ka dorbar thawaiñ jong ka India.
U Modi u la ong ba ka India kaba shaniah halade ka la mih kum ka rong jong ka jingkyrmen bad ka pdeng jong ka jingkhring ïa ka pyrthei. U la batai ïa ka FTA ba la ïasoi bad ka European Union kum “ka kmie jong baroh ki jingïateh” kaba thmu ïa ki samla kiba don jingangnud bad ka India kaba lah ban shaniah halade.
Da kaba pynksan ïa ka jingdonkam jong ki mar kiba bha bad ban buh ïa ki nongrim ha ka jingpynmih mar jong ka India, u la ong, lada ngi ïaid bad ka jingbha kaba ha khlieh duh, ngin ym ïoh khajna tang na ki nongthied ha kylleng ka EU, hynrei ngin jop ruh ïa ki dohnud jong ki.”
U Modi un jubab ïa ka bynta ban pynpaw ka jingsngewnguh halor ka jingkren jong ka President ha Lok Sabbha ha ka 4 tarik Rymphang ha ka por ba long ka dorbar mang tyngka jong ka Parliament.
Ka sorkar ka la ai por 18 kynta ha Lok Sabha ban ïakren ïa ka Motion of Thanks ïa ka jingkren jong ka President ha ka dorbar jong ka Parliament ha ka dorbar mang tyngka. Kane ka jingïakren kan long ha ka 2, 3, bad 4 tarik u Rymphang. Ïa kane ka rai la shim ha ka jingïalang jong ka Lok Sabha’s Business Advisory Committee (BAC) ha ka sngi Palei. Ka Rajya Sabha kan ïakren ïa ka Motion of Thanks ïa ka jingkren jong ka President na ka bynta 16 kynta ha ka 2, 3, bad 4 tarik u Rymphang. Ïa kane ka rai la shim ha ka jingïalang jong ka BAC jong ka ïingdorbar ba hakhliehduh.
