Kolkata, K’lyngkot:
Ka kynhun Central Bureau of Investigation (CBI) ha ka sngi Palei ka la sdang ïa ka jingkhynra ha ki jaka bapher bapher hangne ha kaba ïadei bad ka jingtohkit jong ka halor ka jingkynnoh thok ha ki bank kaba donkti haduh kumba T. 1,000 klur ka pisa, ong uwei u heh sorkar.
Ka jingtalasi ka dang ïaid ha kajuh ka por ha ki ophis bad ki jaka sah jong ki nongpynmih ïa kawei ka kompeni pisa kaba don ha Kolkata, u la ong. La pynjari ïa kiwei pat ki bor pdeng ha ki jaka ba ki jingkhynra ki dang ïaid, u la ong.
“Ïa ki jingtalasi la pynlong ha ki katto katne ki jaka, kynthup ïa ka Alipore, ha kaba ïadei bad ka mukotduma jong ka jingleh thok bank kaba heh bha kaba ïadei bad u nongai ram jong ka tnad paidbah,” ong u heh jong ka kynhun CBI.
Ka bank ka la kynnoh ïa kawei ka kompeni pisa kaba don ha East Kolkata ba ka la shim kabu ïa ka pisa da kaba shu shim ram, hadien kane ka tnad pdeng ka la sdang ïa ka jingtohkit.
Ki heh jong ka kynhun CBI ki la ong ba ka jingkynnoh ha kaba ïadei bad ka jingpynïaid ïa ka pisa ka la long hapdeng u snem 2014 bad 2020.
Ki jingkynnoh ba kongsan ki long pyrshah ïa ki arngut ki Director jong ka kompeni pisa bad kawei na ki kompeni ba ïatreilang jong ka, u la ong. Kine ki ar tylli ki tnad ki la leit sha ka bank paidbah ban pan ram bad ki la aiti ïa ki kot ki sla ban kyrshan ïa ki aplikeshon jong ki.
Katkum ka jingujor jong ka bank, kawei na ki kompeni ha kaba sdang ka la shim ram lypa kaba T.730.82 klur, katba ka Associate Firm ka la shim ram kaba T.260.20 klur, la ong u heh ka CBI.
La mynjur ruh ïa kiwei pat ki ram ha ki bynta. Hynrei ka bank ka la kynnoh ba baroh ar tylli ki kompeni ki pynkheiñ ïa ka jingïateh ram bad ki khlem siew ïa ka ram ha ka por kaba biang.
Hadien ka jingtohkit ba nyngkong, ka kynhun CBI ka la kynnoh ba ki ar tylli ki kompeni ki la shim ruh ïa ka ram kaba shongdor da ki hajar klur tyngka na ym duna ïa ka hynriew tylli kiwei pat ki bank, ha kaba ka bynta kaba kongsan jong ka kim shym la siew.
Ha u snem 2023, arngut ki heh jong ka bank paidbah ba ïadei kam ki la ujor da ka ejahar kaba pura sha ka CBI ha kaba ïadei bad ka jingleh thok ïa ka pisa kaba T.1,000 klur.
Hadien kata ka CBI ka la buh jingmudui mukotduma pyrshah ïa ki ar tylli ki kompeni bad ki nongpynmih jong ki, la bynrap biang une u heh sorkar.
