Shillong, K’Lyngkot 30
U Myntri ka Sorkar Jylla u ba dei khmih ïa ka tnat ka koit ka khiah u Bah Wailadmiki Shylla ha ka sngi Thohdieng u la pynbna ba ka Sorkar Jylla ka la lah ban pynbeit haba ïadei ka jingsahkut ka bainong trei jong ki nongtrei Asha ka Jylla.
Haba kren sha ki nongthoh khubor u Bah Wailad u la ïathuh ba ka bainong trei ba sah jong ki nongtrei Asha ka Jylla ka dei ka bhah ban siew da ka Sorkar Pdeng. “Ngi la dep pynbeit haba ïadei bad ka jingsahkut ka bainong ki nongtrei Asha hapoh ka Jylla” la ong u Bah Wailad.
U Bah Wailad u la pyntip ruh ba ki nongtrei Asha hapoh ka Jylla ki la weng ïa ka jingïakhih jong ki kaba ki la pynlong da kaba sangeh treikam. “Katkum ka jingtip jong nga, ki nongtrei Asha ki la weng ïa ka jingïakhih sangeh treikam jong ki” u la ong.
Haba kylli, u Bah Wailad u la ong, ba ki don katto katne ki jyrwit jyrwat na ka liang jong ki ba sahkut ka bainong ba ki dei ban ïoh, hynrei ym dei na ka tnat ka koit ka khiah bad ki sngewthuh ïa kata, kumta ki nongtrei Asha ki la weng noh ïa ka jingïakhih jong ki.
Kum ban shu kdew, Ki nongtrei Asha ki ba don ha ka shatri ka Meghalaya Asha Workers’ Union (MAWU) ki la sdang ïa ka jingïakhih jong ki da kaba sangeh treikam naduh ka 8 tarik Kyllalyngkot 2026, halor ka nongrim ba ki khlem pat ïoh ïa ka jingsiew (Incentives) kaba ki dei ban ïoh na ka Sorkar Pdeng.
Shuh-shuh ki nongtrei Asha kiba don palat 7000 ngut ha ka Jylla, ki pynpaw ba ka National Health Mission (NHM) ka dei ka daw halor ka jingslem kine kiei-kiei baroh, da kaba pynkynriah ïa ka rukom siew na ka Asha App sha kawei pat ka rukom siew da kaba kdew ba ka Sorkar Jylla ka la siew dep ïa ka ‘honorarium’ bad ki jingsiew ‘incentives’ katba na ka Sorkar Pdeng ka dang sah kut.
