Shillong, K’Lyngkot 30
Ka Lum Sohpetbneng Committee, Seng Khasi Kmie ka pyntip ba ka “Kiew Pyneh Rngiew” ba shisien shi snem sha kliar jong u Lum Sohpetbneng, kan sa long ha ka 01 tarik u Rymphang, 2026.
Ha ka kyrwoh ba la phah da u Bah S.Bareh, Secretary, Lum Sohpetbneng Committee u la ong ba ha katei ka sngi yn sdang ïa ka lehniam ha ka khyrdop ha ka por 6 baje mynstep bad bud pat ha duwan ba kyntang jong u Lum naduh ka por 8 baje mynstep ïa ka ban pyndep da ka Kynhun ki Tymmen ki San jong ka Seng Khasi Kmie.
Lyngba kane ka kyrwoh ba la phah, ka Seng ka ïa wer ïa baroh ki parakur parakha ba kin wan ïa shim bynta sha katei ka lehniam ba shisien shi snem.
U Bah S.Bareh u la pyntip ruh ïa baroh ki ban wan ïa shim bynta ba yn ym shah ban kiew da ki Bos sha jrong bad yn khang ban kiew kali sha jrong Lum hadien ka por 1 baje mynsngi. Ïa ki kali ba hiar pat yn pyllait naduh ka por 2 baje mynsngi.
Shuh shuh la mana ruh ban buh basa ne die madan ha shi lynter ka surok naduh ba ïeng ki ïing jong ka Seng Khasi (Swadesh Darshan) shaduh sha kliar jong u Lum Sohpetbneng. Kumta la kyrpad ïa baroh ban ïa trei lang bad ki nong pynïaid khang ba katei ka sngi kan long kaba ïaid beit ïaid ryntih khamtam bad ka jingïaid bad pynïeng ïa ki kali kiba wan. Nalorkata, ka Seng Khasi Kmie ka pynbna ruh ba ka duwan jong u Lum Sohpetbneng kan plie man ka sngi naduh ka sngi Kiew Pyneh Rngiew haduh ka 15 tarik u Rymphang, 2026 naduh ka por 8 baje mynstep haduh 1 baje mynsngi ban ai lad ïa ki paidbah kiba kwah ban leit duwai.
