Shillong, K’lyngkot 30
Ka long shisha ka jingduhnong ïa kiba shong die soh ha Laimer namar ki la bun kiba la mih noh namar kam mih shuh naduh ba la dep shna ïa ka surok Four-Lane na Umshyrpi sha Hynñiewmer.
Ki dukan kiba diesoh ha Laimer ki don palat khadwei tylli kiba ju shong diesoh man la ka sngi hynrei kiba dang shong haduh mynta ki don satang saw tylli ki dukan.
Kumban shu pynkynmaw kine ki dukan ha Laimer ki la mih ha ka por ba wan u khñiang jingpang Covid-19 bad ka la long shisha ka jingmyntoi ïa ki paidbah kiba leit kiba wan, kiba bunkam ki bym lap por ban rung sha ki jaka ïew ki la ioh ban thied na kine kiba die harud surok.
Ka jingsdang hiar ka ïew diesoh ha Laimer ka dei ha u bnai Nohprah hadien ba la dep ïa ka surok Four-lane na sawmer shaduh skul Gorkha namar ki la ïaid beit na kane ka surok thymmai.
Haba U Nongsaiñ Hima u la leit ban buddien, la lap ba kiba shongdie soh ha Laimer ki don satang 4 tylli bad 7 tylli ki la leit shong noh ha Sawmer bad kiwei ki jaka.
Haba ïakren bad ki longkmie kiba la leit shong die soh ha Sawmer ki la ïathuh ba ki la ïoh jingbit na ka shnong ban shong ha katei ka jaka bad ki don ruh sa ki wei ki wei ban dang wan shong.
Haba ïakren bad kiba dang shong ha Laimer ki la ïathuh ba mynta ki dang pyrshang ban wad jaka.
Ki la ïathuh ruh ba ka jingdie ïa ki soh mynta ka la duna bha bad ym lah hi ruh ban die namar kim don shuh kiba wan thied.
Ki la ïathuh ruh ba naduh ba la ïaid ki kali na surok thymmai bun ba ki shu shongkai bad ki soh bun ba pyut bad shu bret kai.
Kaba la ktah bha ïa kiba shong die soh ha Laimer ka daw namar ba ki kali ki la ïaid lyngba ka surok na Umshyrpi sha 101 Area bad kiew beit sha Sawmer bad la duna kiba ïaid lyngba na Laimer, Upper Shillong.
