Shillong, K’Lyngkot 30
Ka Meghalaya Board of School Education (MB OSE) ha ka sngi Thoh-dieng jong ka taïew ka la sdang ban pynlong ïa ka eksamin Secondary School Leaving Certifi-cate (SSLC) 2026, ha baroh kawei ka Jylla.
Kane ka eksam SSLC kan kut ha ka 11 tarik u bnai Rymphang 2026.
Ha ki jaka thoh eksamin la ïohi ba ki samla pule ki la ïa poi kloi bad ki ïaleh katba lah ban thoh pyndep ïa ka sobjek thoh eksamin ba nyngkong, kata ka sobjek English ha kaba na ka liang ki bor pynïaid eksamin ki la shim ïa ki sienjam ban pynthikna ïa ka jingpynïaid beit ïaid ryntih ïa ki eksamin.
Lah ban kdew, mynta u snem ïa ka eksamin jong ka SSLC la pynlong kham kloi lada ïa nujor bad ki snem ba la dep kum shi bynta ban pynïahap ïa ka por thoh eksamin bad ka por ban sdang thymmai ïa ka Academic Calendar.
Kane ka jingpynlong kloi ïa kane ka eksam ka dei ruh kum shibynta ban ai lad ïa kito ki khynnah ki bym lah ban pass ïa ka eksamin ha ka jingpyrshang ba nyngkong ban ïoh ïakhun biang ïa ki sobjek ba kim lah lyngba ka eksamin Supplementary Examination.
Ka Supplementary Examination ïa kaba la pyntreikam ha u snem ba la dep, ka ai lad ïa ki khynnah ban thoh biang ïa ki sobjek ba kim lah ha ka eksamin ba nyngkong khlem da donkam ban ap sa shisnem.
Katkum ka por ba la buh ban thoh eksamin, ka sobjek Science kan long ha ka 2 tarik u Rymphang, Health and Physical Education/Computer Science/Vocational Subject ha ka 4 tarik, Social Science ha ka 6 tarik, Mathematics/Special Mathematics ha ka 9 tarik, Indian Languages/Additional English ha ka 11 tarik Rymphang 2026.
